“Meta Platforms” şirkəti “Instagram” sosial şəbəkəsində təqdim olunan istəyə bağlı ucdan-uca şifrəli mesajlaşma (end-to-end encryption – E2EE) funksiyasının 8 may tarixindən etibarən ləğv ediləcəyini elan edib.
Sfera.az xəbər verir ki, şirkətin yaydığı rəsmi məlumata əsasən, bu dəyişiklik qüvvəyə mindikdən sonra istifadəçilərin şəxsi yazışmaları artıq tam məxfi rejimdə qalmayacaq.
Bildirilir ki, təhlükəsizlik tədbirləri çərçivəsində mesajların məzmunu xüsusi sistemlər tərəfindən skan ediləcək. “Meta” rəhbərliyi bu addımı platformadakı ümumi təhlükəsizlik səviyyəsini artırmaq və potensial zərərli fəaliyyətlərin qarşısını öncədən almaq məqsədilə atdığını bildirir.
Qeyd edək ki, sözügedən yenilik istisnasız olaraq bütün istifadəçilərə şamil ediləcək və 8 may tarixindən etibarən avtomatik rejimdə tətbiq olunacaq. Bununla da, “Instagram”da mesajlaşma gizliliyi ilə bağlı mövcud olan standartlarda köklü dəyişiklik baş verəcək. Mütəxəssislərin qənaətinə görə, bu qərar istifadəçi məxfiliyi ilə bağlı debatları yenidən alovlandıracaq və platformanın gələcək təhlükəsizlik siyasətinə dair bir çox yeni suallar doğuracaq.
