Otuz il əvvəl qaranlıq qalan cinayətin izi tapılıb, iplə boğulub boruya atılan şəxsin qatilləri ədalət qarşısına çıxarılıb.
Demokrat.az xəbər verir ki, bu barədə Baş Prokurorluq və Daxili İşlər Nazirliyi birgə məlumat yayıb. Hadisə 1996-cı ilin aprelində baş verib. Həmin vaxt Gülməmməd Bayramov evindən çıxsa da, bir daha geri qayıtmayıb. Faktla bağlı 1997-ci ildə cinayət işi açılsa da, hadisənin üstünü açmaq uzun illər mümkün olmayıb.
İstintaq idarəsinin keçirdiyi əməliyyat nəticəsində Şahin Cəlilov və Hidayət Qafarovun bu qətldə əli olduğu müəyyən edilib. Onların taksi fəaliyyəti ilə məşğul olan şəxsi tamah məqsədilə öldürdükləri məlum olub.
Araşdırma zamanı üzə çıxıb ki, həmin şəxslər “Neftçilər” metrostansiyası yaxınlığında Gülməmməd Bayramovun maşınına müştəri kimi əyləşiblər. Qaraçuxur qəsəbəsinə gedən yolda sürücünü iplə boğaraq qətlə yetiriblər. Cinayətkarlar izi itirmək üçün meyiti qəsəbə ərazisindəki beton borunun içində gizlədiblər. Zərərçəkmişin avtomobilini isə hissələrə ayırıb sataraq pulu bölüşüblər.
Şübhəli şəxslərin ifadələri yerində yoxlanılan zaman Fövqəladə Hallar Nazirliyinin köməyi ilə ərazidə axtarış aparılıb. Nəticədə Gülməmməd Bayramovun meyitinin qalıqları aşkar edilib.
Məhkəmənin qərarı ilə Şahin Cəlilov və Hidayət Qafarov barəsində həbs qətimkan tədbiri seçilib. Hazırda istintaq davam edir.
Yəni, 1996-cı ildə taksi sürücüsünü öldürüb meyitini boruya atan və maşınını parçalayıb satan iki nəfər 30 il sonra polis tərəfindən yaxalanaraq həbs edilib.
