Son günlər müşahidə olunan qeyri-sabit hava şəraiti insanların gündəlik həyatına təsirsiz ötüşmür. Gün ərzində temperaturun tez-tez dəyişməsi, güclü külək, yağış və atmosfer təzyiqindəki fərqlər xüsusilə həssas insanlarda müxtəlif narahatlıqlar yarada bilir. Belə hava dəyişiklikləri bəzi insanlarda halsızlıq, yorğunluq və əhval dəyişiklikləri ilə müşahidə oluna bilər.
Maraqlıdır, gün ərzində havanın dəyişkən olması insan sağlamlığına necə təsir edir?
Mövzu ilə bağlı terapevt Etibar Süleymanov Sfera.az-a açıqlama verib. Onun sözlərinə görə, havanın tez-tez dəyişməsinin əksər insanlara elə böyük də təsiri olmur:
“Sadəcə bəzi adamlar geyim rejimini seçə bilmədiyi üçün xəstələnir. Hava gah isti, gah da soyuq olduqda insanlar geyimə qərar verə bilmir. Bunun nəticəsində də soyuqdəymə halları baş verir. Xüsusilə yaşlı insanlar, immuniteti zəif olanlar bu zaman daha həssas olurlar. Ona görə də, xroniki xəstəliyi olanlar, immuniteti zəif olanlar, yaşlı insanlar, körpə uşaqlar geyimlərinə fikir verməlidir”.
Terapevt vurğulayıb ki, hava şəraitinə uyğun geyinilsə, xəstəliklərdə yüngül keçər:
“Adətən belə hava dəyişmələri olanda, metohəssas insanlarda narahatlıqlar yaranır. Xüsusilə virus infeksiyaları da aktivləşir. Bu dövrdə orqanizmin müdafiə sistemi daha çox yüklənir və insanlarda halsızlıq, baş ağrısı və ümumi yorğunluq da müşahidə oluna bilər. Buna görə də belə dəyişkən hava şəraitində düzgün qidalanma və isti-soyuq balansına diqqət etmək də vacib sayılır”.
