ABŞ prezidenti Trampın İranla nüvə sazişi üzrə danışıqların uğursuzluğundan sonra hücum variantlarını nəzərdən keçirdiyi bildirilir.
Gündəm24.az xəbər verir ki, CNN məsələ ilə tanış mənbələrə istinadən iddia edib ki , ABŞ prezidenti Donald Tramp nüvə danışıqlarının uğursuzluğundan sonra İrana qarşı böyük bir hücum planlaşdırır.
Xəbərdə bildirilirdi ki, Vaşinqton və Tehran arasında İranın nüvə proqramını və ballistik raket istehsalını məhdudlaşdırmaq məqsədli ilkin danışıqlar uğursuzluğa düçar olduqdan sonra Tramp İrana qarşı yeni böyük hücumu nəzərdən keçirir.
Televiziya mənbələri bildirir ki, Trampın hazırda nəzərdən keçirdiyi variantlar arasında İran liderlərinə və təhlükəsizlik işçilərinə, eləcə də nüvə obyektlərinə və hökumət binalarına qarşı hava hücumları da var.
Lakin ABŞ lideri hələ yekun qərar verməyib və əvvəllər bölgəyə göndərilən zərbə qrupunun gəlişi ilə hərbi müdaxilə üçün daha çox seçim imkanına malik olacağını düşünür.
Mənbələrə görə, Trampın İrana qarşı son təhdidlərindən sonra iki tərəf arasında daha əhəmiyyətli birbaşa əlaqə olmayıb.
Hərbi müdaxilə təhdidləri fonunda ABŞ İran rəsmiləri ilə görüşmək üçün ilkin şərtlər irəli sürüb: uranın zənginləşdirilməsinin tam dayandırılması, İranın ballistik raket proqramına məhdudiyyətlərin qoyulması və regionda İran tərəfindən dəstəklənən qüvvələrə dəstəyin dayandırılması.
Daha əvvəl ABŞ mediası bildirib ki, ötən həftə İranla gərginliyi azaltmaq üçün aparılan danışıqlar nəticəsiz qalıb, Tehran Trampın tələblərinə tabe olmayıbdır.
28 yanvarda ABŞ prezidenti Donald Tramp böyük bir donanmanın İrana doğru hərəkət etdiyini açıqlayıb. O, İranı iyun hadisələrindən daha dağıdıcı hücumla hədələyib və belə hallar təkrarlanmasın deyə xəbərdarlıq edib.
Sədaqət Həsənova
