Rusiya ordusu Ukraynanın strateji enerji infrastrukturuna qarşı növbəti kütləvi zərbələrini endirib. Son sutka ərzində Ukrayna Dövlət Neft-Qaz Şirkəti olan “Naftoqaz”ın bir neçə mühüm obyekti hədəf alınıb.
NOCOMMENT.azxəbər verir ki, bu barədə “Naftoqaz” şirkəti rəsmi bəyanat yayıb. Şirkətin məlumatına görə, rusiya hərbi birləşmələri gün ərzində Ukraynanın Xarkov və Poltava vilayətlərində yerləşən neft-qaz obyektlərinə intensiv zərbələr endirib.
“Hücumlar nəticəsində istehsalat avadanlıqlarına ciddi ziyan dəyib və ərazilərdə irimiqyaslı güclü yanğınlar qeydə alınıb”, — deyə “Naftoqaz”ın rəsmi açıqlamasında bildirilir.
Şirkət rəhbərliyi zərbələr zamanı bütün personalın təhlükəsiz şəkildə təxliyə edildiyini və hazırda hadisə yerlərində müvafiq operativ xidmətlərin işlədiyini bəyan edib. Bununla belə, hərbi aktivliyin davam etməsi səbəbindən hələlik dəymiş ziyanın tam miqyasını müəyyən etmək mümkün deyil: “Təkrar zərbələrin endirilməsi riski və təhlükəsi yüksək olduğundan, hücumların törətdiyi yekun fəsadları hələ ki tam qiymətləndirmək mümkün deyil”.
Qeyd edək ki, Ukraynanın enerji və yanacaq infrastrukturunun hədəf alınması ölkədə ümumi enerji təhlükəsizliyi ilə bağlı riskləri daha da artırır.
