Məşhur müğənni Rıza Tamer Bodrumdakı evində axşam saatlarında qəfil halının pisləşməsi səbəbilə xəstəxanaya yerləşdirilib.
Gündəm24.az Türkiyə mətbuatına istinadən xəbər verir ki, təcili tibbi yardım maşını ilə aparılan sənətçinin vəziyyətinin ağır olaraq qaldığı bildirilir.
Muğlanın Bodrum rayonunun Konacık məhəlləsində yaşayan Rıza Tamerin səhhəti pərəstişkarlarını ciddi narahat edib. İddialara görə, o, gündəlik istifadə etdiyi dərmanları qəbul etdikdən sonra dincəlmək üçün uzanıb və bir müddət sonra qəfil özünü pis hiss edib.
Bildirilir ki, əvvəlcə ürəkbulanma yaranıb, daha sonra isə nəfəs almaqda çətinlik çəkib. Yaxınları dərhal təcili tibbi yardım xidmətinə məlumat veriblər. Hadisə yerinə gələn həkim briqadası ilk tibbi yardımı sənətçinin evində göstərib.
XƏSTƏXANAYA YERLƏŞDİRİLDİ
İlkin müdaxilədən sonra Tamer təcili tibbi yardım maşını ilə Bodrum Dövlət Xəstəxanasına aparılıb. Burada aparılan müayinələrdən sonra daha ətraflı yoxlanış və müalicə üçün Bodrumdakı özəl xəstəxanalardan birinə köçürülüb.
VƏZİYYƏTİ AĞIRDIR
Məlumata görə, Rıza Tamerin vəziyyəti hələ də ağır olaraq qalır. Müalicəsi davam etdirilir və vəziyyəti həkimlər tərəfindən yaxından izlənilir.
RIZA TAMER KİMDİR?
Rıza Tamer ilk dəfə “Popstar Türkiyə” yarışmasının ikinci mövsümündəki çıxışı ilə tanınıb. Yarışma zamanı güclü səsi və səhnə performansı ilə diqqət çəkən sənətçi finalda üçüncü yerə layiq görülərək geniş auditoriya qazanıb.
Əslən Kahramanmaraşdan olan Tamer musiqi karyerasını inkişaf etdirmək üçün İstanbula köçüb. Yarışmaya qatıldığı dövrdə 20 yaşlarının əvvəllərində olduğu, hazırda isə 30 yaşlarının sonlarında olduğu ehtimal edilir.
“Popstar”dan sonra musiqi fəaliyyətini davam etdirən sənətçi bir neçə mahnı yayımlasa da, bu layihələr gözlənilən uğuru əldə etməyib. Buna baxmayaraq, canlı çıxışları və müxtəlif tədbirlərdə iştirakı ilə musiqi sahəsində aktivliyini qoruyub.
Son olaraq “Bəndən sonra” adlı duyğusal mahnısı ilə yenidən diqqət mərkəzinə düşən Rıza Tamer sosial şəbəkələrdə böyük maraq doğurub. Mahnının sözləri və ifası xüsusilə gənc dinləyicilər tərəfindən rəğbətlə qarşılanıb.
