İsrail Müdafiə Qüvvələri (IDF) “Hizbullah” terror qruplaşmasının Livandakı təcili yardım maşınlarından və tibb müəssisələrindən “geniş şəkildə hərbi məqsədlərlə” istifadə etdiyini bildirib.
Sfera.az xəbər verir ki, bu barədə ordunun sözçüsü, polkovnik Aviçay Adraee məlumat yayıb.
“Tibb müəssisələrindən və təcili yardım maşınlarından hərbi məqsədlər üçün istifadənin dərhal dayandırılması barədə xəbərdarlıq edirik. Vurğulayırıq ki, bu hal davam edərsə, İsrail beynəlxalq hüquqa uyğun olaraq ‘Hizbullah’ın həmin müəssisə və vasitələrdən istifadə etməklə həyata keçirdiyi hər hansı hərbi fəaliyyətə qarşı zəruri tədbirlər görəcək”, — deyə o bildirib.
Livan Səhiyyə Nazirliyinin məlumatına görə, dünən İsrailin Livanın cənubundakı səhiyyə mərkəzlərindən birinə endirdiyi zərbə nəticəsində ən azı 12 tibb işçisi həlak olub. Digər bir hücumda isə “Hizbullah” və onun müttəfiqi “Amal” hərəkatı ilə əlaqəli olan iki paramedikin öldüyü bildirilir.
