Son illər sağlam qidalanma ilə bağlı müzakirələrdə ağ və qara unun fərqi tez-tez gündəmə gəlir. Bəziləri hesab edir ki, ağ undan hazırlanan məhsullar insan orqanizminə ciddi zərər vurur, digərləri isə bu fikri şişirdilmiş sayır.
Məsələyə aydınlıq gətirmək üçün KONKRET.az-a açıqlama verən qida məsələləri üzrə ekspert İlkin Şirinov bildirib ki, ağ çörəkdən mümkün qədər az istifadə edilməlidir.
Ekspertin sözlərinə görə, bu, işlənmiş un sayılır və tərkibindəki lif, vitamin və mineralların böyük hissəsi itirildiyi üçün orqanizmə xeyirdən çox zərər verir:
“Ağ çörək insanlarda artıq çəki yaradır, qəbizlik və həzm sisteminin ləngiməsinə səbəb olur. Lif və vitaminlər azaldığı üçün təkcə kalori qalır. Qara un isə daha dənlidir, kəpək və rüşeym hissəsi saxlanılır, bu da onu liflərlə zəngin edir və həzmi tənzimləyir.”
İlkin Şirinov əlavə edib ki, xüsusilə şəkərli diabetdən və artıq çəkidən əziyyət çəkən insanlar ağ undan uzaq durmalıdırlar:
“Qara un uzunmüddətli toxluq verir, qan şəkərini kəskin qaldırmır, bu səbəbdən sağlam qidalanmaq və çəkisini qorumaq istəyənlər qara çörəyə üstünlük verməlidirlər.”
