Vətən müharibəsi zamanı, 2020-ci il noyabrın 5-i ordumuzun birinci kəşfiyyat qrupu Şuşaya daxil oldu. Şuşaya daxil olan mayor rütbəli zabit mənim əsgərim olub. O, həmin gün mənə zəng edib dedi: “Komandir, çiyinlərinizdən ağır yükü götürdük”.
Gündəm24.az xəbər verir ki, bu sözləri Axar TV-ə geniş müsahibəsində Azərbaycan müdafiə nazirinin sabiq müavini, Müdafiə Nazirliyinin Baş Əməliyyat İdarəsinin sabiq rəisi, general-mayor Elbrus Orucov deyib.
“Cıdır düzü istiqamətində Yuri Qaqarin adına düşərgə var idi. Döyüşlərdə olduğum zaman qərargahım orada yerləşirdi. Elə bayrağı da oraya sancmışdılar. 8 noyabrda isə qüvvələrimiz Şuşaya daxil oldu.
Həmin gün qardaşlarım gəlib məni təbrik edib, nə qədər dözümlü olduğumu, ölkədən getmək əvəzinə qələbəni necə gözlədiyimi dedilər. Mən həmin Elbrus Orucovam”, – deyə o əlavə edib.
