İraq Müdafiə Nazirliyi ölkədə yerləşən hava bazalarına qarşı həyata keçirilən hücumlara səssiz qalmayacaqlarını bildirib.
Gündəm24.az xəbər verir ki, nazirliyin ABŞ mərkəzli X şirkətinin sosial media platformasındakı rəsmi hesabından yayılan açıqlamada son günlər ölkədəki Şəhid Ala Hava Bazası və Şəhid Əli Fıleyyih Hava Bazasına qarşı həyata keçirilən raket və pilotsuz uçuş aparatı (PUA) hücumlarına etiraz edildiyi qeyd olunub. Açıqlamada bu bazaların tam şəkildə İraqın suverenliyi altında olduğu vurğulanıb və burada hər hansı xarici qüvvənin yerləşmədiyi bildirilib.
Həmçinin qeyd edilib ki, həmin bazalarda İraq Hərbi Hava Qüvvələrinə məxsus zabit və şəxsi heyət, eləcə də İraqın hərbi təyyarə parkı yerləşir. Müdafiə Nazirliyi bildirib ki, belə hücumlar təkrar olunarsa, İraq buna səssiz qalmayacaq və ölkə hər cür hücuma qarşı bütün hüquqlarından istifadə edəcək.
