Gündəlik həyatda baş ağrısı, əzələ ağrıları və ya qızdırma kimi şikayətlərin aradan qaldırılması üçün tez-tez istifadə edilən ağrıkəsicilər ilk baxışda zərərsiz görünə bilər.
Lakin mütəxəssislər xəbərdarlıq edirlər ki, bu dərmanların xüsusilə nəzarətsiz, uzunmüddətli və yüksək dozada istifadəsi ciddi sağlamlıq problemlərinə yol aça bilər.
Sfera.az Türkiyə mediasına istinadən xəbər verir ki, kardiologiya mütəxəssisi dr. Erhan Yazıcı bildiriB ki, reseptsiz dərmanların geniş istifadəsi insanların həkim məsləhəti olmadan ağrıkəsicilərə müraciət etməsinə səbəb olur. Onun sözlərinə görə, bu vəziyyət ürək-damar sisteminə mənfi təsir göstərə bilər.
Mütəxəssis qeyd edir ki, xüsusilə qeyri-steroid iltihab əleyhinə dərmanlar (QSİƏP) qrupuna aid ağrıkəsicilər qan təzyiqinin yüksəlməsinə, damar divarlarının zədələnməsinə və qan laxtalanma riskinin artmasına səbəb ola bilər. Bu isə infarkt və insult kimi ciddi nəticələrə gətirib çıxara bilər.
“Görünüşdə zərərsiz olan bu dərmanlar uzun müddət istifadə edildikdə orqanizmə ciddi təsir göstərir,” – deyə dr. Yazıcı vurğulayıb.
O, həmçinin qeyd edir ki, uzunmüddətli ağrıkəsici istifadəsi böyrək funksiyalarının pozulmasına, orqanizmdə maye yığılmasına və nəticədə ürəyə əlavə yük düşməsinə səbəb ola bilər. Bu isə xüsusilə ürək xəstəliyi olanlar, hipertoniya xəstələri və yaşlı insanlar üçün daha böyük risk yaradır.
Mütəxəssis vətəndaşlara müraciət edərək bildirir ki, heç bir dərman, o cümlədən ağrıkəsicilər həkim məsləhəti olmadan istifadə edilməməlidir. Xroniki xəstəlikləri olan şəxslər isə qəbul etdikləri digər dərmanlarla qarşılıqlı təsir riskinə görə mütləq mütəxəssis nəzarətində olmalıdırlar. Sonda dr. Erhan Yazıcı vurğulayıB ki, sağlam həyat üçün dərmanlardan şüurlu və düzgün istifadə olduqca vacibdir.
