Azərbaycanda bir çox vətəndaş gəlirlərini artırmaq və ya peşəkar bacarıqlarını genişləndirmək üçün əlavə iş yerində çalışmağa üstünlük verir. Lakin bu seçim bəzən hüquqi baxımdan suallar doğurur: əsas iş yerinin razılığı tələb olunurmu, iş saatlarının uyğunluğu necə tənzimlənir və hansı hallarda məhdudiyyətlər qoyulur? Mövcud qanunvericilik bu məsələyə hansı çərçivədə yanaşır?
Mövzu ilə bağlı KONKRET.az-a açıqlama verən vəkil Etibar Qarayev bildirib ki, əmək qanunvericiliyinə əsasən, şəxsin əsas işindən əlavə olaraq başqa yerlərdə də çalışmaq hüququ var.
“Burada əsas diqqət yetirilməli məqam iş saatlarının uyğunluğudur. Əgər əlavə iş yerindəki saatlar əsas fəaliyyət sahəsinin vaxtı ilə üst-üstə düşürsə, bu halda mütləq şəkildə əsas işəgötürənin razılığı alınmalıdır. Əks halda, yəni əlavə iş fəaliyyəti əsasdan sonrakı saatlarda həyata keçiriləcəksə, işəgötürənin icazəsi tələb olunmur”.
Bununla yanaşı, hüquqşünas digər mühüm məqama da diqqət çəkib.
“Əgər şəxs əsas iş yerində zərərli və ya sağlamlıq üçün təhlükəli şəraitdə çalışırsa, onun əlavə iş yerinin də eyni kateqoriyaya aid olması qanunla qadağandır. Yəni, işçinin həm əsas, həm də əlavə iş yerində eyni zamanda təhlükəli və zərərli işlərdə çalışmasına yol verilmir”.
Beləliklə, qanun əlavə iş yerində çalışmağa icazə versə də, bu hüququn istifadəsi zamanı fəaliyyət saatlarının toqquşmaması və əmək təhlükəsizliyi tələblərinin qorunması əsas şərtlər kimi önə çıxır.
