Mayın 1-də Azərbaycan Tennis Federasiyasının ümumi yığıncağı keçirilib.
Gündəm24.az xəbər verir ki, Gənclər və İdman Nazirliyinin inzibati binasında təşkil olunan tədbirdə gənclər və idman naziri Fərid Qayıbov çıxış edib. O, 22 il federasiyaya rəhbərlik etmiş Oqtay Əsədova və bütün üzvlərə fəaliyyətlərinə görə minnətdarlığını bildirib.
İclasın gündəliyi təsdiq edildikdən sonra 2022–2026-cı illər ərzində federasiyada görülən işlərə dair hesabat təqdim edilib. Hesabat səsvermə yolu ilə təsdiqlənib. Daha sonra Azərbaycan Tennis Federasiyasının Nizamnaməsi yeni redaksiyada səsvermə yolu ilə qəbul olunub.
Ardınca federasiyanın rəhbərliyinə seçkilər keçirilib. Səsvermənin nəticələrinə əsasən, Ənvər Ənvərli 4 il müddətinə federasiyanın yeni prezidenti seçilib. Əliağa Fətullayev federasiyanın birinci vitse-prezidenti, Amal Əlili, Orxan Manaflı vitse-prezidentlər, Ramiz Həmzə-Zadə, Ləman Əliyeva, Elvin Məsimov İdarə Heyətinin üzvləri seçiliblər. Daha sonra Nəzarət-Təftiş Komissiyasına da seçkilər keçirilib. Fəzli Əzizov sədr, Faiq İsmayılov və Azər İsmayılov isə üzvlər seçiliblər.
Ənvər Ənvərli çıxış edərək ona göstərilən etimada görə təşəkkürünü bildirib. Yığıncaqda çıxış edən federasiyanın sabiq vitse-prezidenti Mehman Qocayev isə yeni rəhbərliyə fəaliyyətində uğurlar arzulayıb.
Xatırladaq ki, Tennis Federasiyasının prezidentiliyindən uzaqlaşdırllan Oqtay Əsədov 2005-ci il dekabrın 2-dən 2020-ci il martın 10-dək (təxminən 15 il) Milli Məclisin sədri vəzifəsində çalışıb.
Oqtay Əsədovun vəzifə pilləsində enişi 2020-ci ildə keçirilən növbədənkənar parlament seçkisindən sonra başlamışdı. Həmin ilin fevralında formalaşan altıncı çağırış Milli Məclisdə Əsədovu yenidən sədr postuna seçmədilər.
Oqtay Əsədov növbəti zərbəni Yeni Azərbaycan Partiyasının 5 mart 2021-ci il tarixində keçrilən növbədənkənar VII qurultayında aldı. Həmin qurultayda onu nə YAP-ın İdarə Heyətinə daxil etdilər, nə də Veteranlar Şurasının tərkibinə saldılar.
Ancaq bu da son olmadı. YAP Oqtay Əsədovun 1 sentyabr 2024-cü il tarixli növbədənkənar parlament seçkilərində iştirakını da məqbul saymadı və partiyanın İdarə Heyəti onun namizədliyini irəli sürmədi. Beləcə, keçmiş spiker Milli Məclisdən tamamilə kənarlaşdırıldı.
Sabiq deputat kimi təqaüddə olan Oqtay Əsədov 2004-cü ildən Azərbaycan Tennis Federasiyasına rəhbərlik edirdi. Nəhayət bu gün o bu qurumdan da kənarlaşdırıldı./Modern.az
