Prezident Ərdoğan iqtisadi hədəfi açıqladı: “Türkiyə oyun dəyişdirici olacaq”

Gündəm24.az  xəbər verir ki, Prezident Rəcəb Tayyib Ərdoğan İstanbulda keçirilən “2-ci İstanbul Təbii Sərvətlər Zirvəsi”ndə Türkiyənin enerji strategiyası ilə bağlı diqqətçəkən mesajlar verib. O bildirib ki, bölgədə artan gərginlik enerji təhlükəsizliyinin nə qədər kritik olduğunu bir daha göstərir və Türkiyə artıq onlarla ölkədən təbii qaz alan böyük enerji mərkəzinə çevrilib.

Ərdoğan vurğulayıb ki, Ankara müdafiə sənayesində olduğu kimi, enerji sahəsində də tam müstəqilliyə nail olmağı əsas hədəf sayır. Onun sözlərinə görə, Türkiyə enerji, mədənçilik və təbii sərvətlər sahəsində daha böyük uğurlara doğru irəliləyir.

Türkiyə lideri Somalidə həyata keçirilən dərin dəniz qazma əməliyyatlarını “tarixi addım” adlandırıb. Ərdoğan həmçinin bildirib ki, Türkiyə artıq terrorla deyil, investisiya və iqtisadi güclə yadda qalır. O qeyd edib ki, kritik minerallar müasir dövrdə neft qədər strateji əhəmiyyət daşıyır və Ankara bu sahədə “oyun dəyişdirici” olmağı hədəfləyir.