Ukrayna ordusu Donetsk Xalq Respublikasında (DXR) sərnişin avtobusuna hücum edib. Hücum nəticəsində ən azı yeddi mülki şəxs həlak olub, 11 nəfər yaralanıb.
Gündəm24.az xəbər verir ki, Rusiya tərəfinin yaydığı məlumata görə, Donetsk Xalq Respublikasının (DXR) rəhbəri Denis Puşilin Moskvadan Simferopola hərəkət edən sərnişin avtobusunun pilotsuz uçuş aparatı ilə hədəfə alındığını bildirib.
Puşilin sosial media hesabında paylaşdığı məlumatda qeyd edib ki, hadisə Yenakiyevo şəhərində baş verib. Onun sözlərinə görə, avtobusa kamikadze dronla hücum edilib və ilkin məlumata əsasən, 7 mülki şəxs həlak olub.
DXR rəhbəri hücum nəticəsində daha 11 nəfərin yaralandığını, zərərçəkənlərə bütün zəruri tibbi yardımın göstərildiyini açıqlayıb.
Hadisə ilə bağlı əlavə araşdırmalar aparılır. Ukrayna tərəfi isə məsələ ilə bağlı hələlik rəsmi açıqlama verməyib.
Sədaqət Həsənova
