FETÖ-nun 2016-cı ilin iyulunda Türkiyədə dövlət çevrilişinə cəhd zamanı və ondan əvvəl Prezident Rəcəb Tayyib Ərdoğana qarşı bir neçə dəfə sui-qəsd törətməyə cəhd etdiyi məlum olub.
Gündəm24.az teleqraf-a istinadən xəbər verir ki, bu barədə “Türkiye” qəzeti məlumat yayıb.
Məlumata görə, sui-qəsdlərdən birinin hərbi təlimlər zamanı törədilməsi planlaşdırılsa da, xüsusi xidmət orqanları şübhəli məqamlar aşkar etdikdən sonra prezidentin həmin tədbirdə iştirakı ləğv olunub.
Rəcəb Tayyib Ərdoğanı məhz Misir lideri Ənvər Sədatın qətlə yetirildiyi üsulla – hərbi parad zamanı rəsmi tribunada və ya iştirakçılar arasında olduğu an silahlı hücumla aradan qaldırmsı planlaşdırılıb.
Qeyd edək ki, 1981-ci il oktyabrın 6-da Misir Prezidenti Ənvər Sədat Qahirədə 1973-cü il müharibəsinin ildönümünə həsr olunmuş hərbi paradı izləyərkən paraddan keçən hərbi yük maşınından düşən radikal islamçı hərbçilər tərəfindən avtomat və əl qumbaraları ilə atəşə tutularaq qətlə yetirilib. Bu sui-qəsdin əsas səbəbi Ənvər Sadatın 1978-ci ildə ABŞ-nin vasitəçiliyi ilə İsraillə imzaladığı Kemp-Devid sazişi və ölkə daxilindəki islamçı müxalifətə qarşı həyata keçirdiyi təqiblər idi.
Növbəti sui-qəsd Türkiyə liderinə qarşı 2016-cı il iyulun 15-nə keçən gecə baş tutub. Lakin Ərdoğanın Marmarisdəki oteli vaxtında tərk etməsi nəticəsində bu plan da pozulub.
Xatırladaq ki, 2016-cı il iyulun 15-də Türkiyədə baş vermiş qanlı çevriliş cəhdi nəticəsində 253 nəfər həlak olub, 2,2 min nəfər yaralanıb. Qiyam yatırıldıqdan sonra yüz minlərlə şəxs işdən azad olunub və yüzlərlə qiyamçı isə ömürlük həbs cəzasına məhkum edilib.
