Payızın gəlişi ilə evlərdə turşu hazırlığına başlanılıb. Qış aylarında süfrələrin əvəzolunmaz təamlarından sayılan ev turşuları düzgün hazırlanmadıqda və saxlanılmadıqda ciddi qida zəhərlənmələrinə səbəb ola bilər.
Xüsusilə məhsulların təmizlənməsi, qabların sterilizasiyası və konservləşdirmə qaydalarına əməl olunmaması sağlamlıq üçün təhlükə yaradır.
Bəs ev şəraitində turşu hazırlayarkən və saxlayarkən hansı qaydalara diqqət yetirilməlidir? Turşunun xarab olduğunu və istifadəyə yararsız hala düşdüyünü necə müəyyən etmək olar?
Gündəm24.az xəbər verir ki, konkret.az-a danışan qida texnoloqu Ağa Salamov bildirib ki, ilk növbədə turşu hazırlamaq üçün sağlam və keyfiyyətli məhsullar seçilməlidir.
“Xiyar, badımcan, pomidor və digər tərəvəzlərin üzərində çürümüş, çatlamış və zədələnmiş hissələr olmamalıdır. Məhsullar emaldan əvvəl torpaqdan və digər çirklərdən tam təmizlənməli, yaxşı yuyulmalı və müvafiq gigiyenik qaydalara uyğun hazırlanmalıdır.
Turşuların saxlanılacağı şüşə qabların sterilizasiyası da xüsusi əhəmiyyət daşıyır. Sterilizasiya olunmuş qablar tam təmiz vəziyyətdə olmalı, onların içinə yerləşdirilən tərəvəzlər və digər ərzaqlar da gigiyenik tələblərə uyğun hazırlanmalıdır”.
Ağa Salamov sarımsaq və göyərtilərin təmizlənməsinə də diqqət yetirilməsinin vacibliyini vurğulayıb. O, bildirib ki, xüsusilə badımcan turşusu hazırlanarkən istifadə olunan sarımsaq və göyərtilər torpaq qalıqlarından tam təmizlənməli, düzgün yuyulmalı və yalnız bundan sonra turşuya əlavə edilməlidir.
Qida texnoloqunun sözlərinə görə, konservləşdirmə zamanı qapaqların keyfiyyətinə də xüsusi diqqət yetirilməlidir. Turşuların bağlanmasında təmiz, steril və kip bağlanan qapaqlardan istifadə olunmalı, birdəfəlik qapaqlar təkrar işlədilməməlidir. Qapaqların paslı, çirkli və ya zədələnmiş olması yolverilməzdir. Bankaların ağzı möhkəm bağlanmalı, hava sızmasının qarşısı alınmalıdır.
Ağa Salamov turşunun xarab olmasını müəyyənləşdirmək üçün bir sıra əlamətlərə diqqət yetirməyin vacibliyini də qeyd edib. Onun sözlərinə görə, turşunun suyunun rənginin dəyişməsi, bulanıqlaşması, dibində qeyri-adi çöküntülərin yaranması, qapağın şişməsi, bankanın açılması zamanı qıcqırma əlamətlərinin müşahidə olunması və kiflənmə məhsulun yararsız hala düşdüyünü göstərə bilər.
Qida texnoloqu belə hallarla qarşılaşdıqda turşunun dadına baxılmamasını və onun qida kimi istifadə edilməməsini tövsiyə edib. Çünki bəzi təhlükəli mikroorqanizmlər və onların toksinləri turşunun görünüşünü, qoxusunu və dadını dəyişmədən də mövcud ola bilər.
Beləliklə, ev şəraitində turşu hazırlayarkən gigiyena, düzgün sterilizasiya və təhlükəsiz konservləşdirmə qaydalarına əməl etmək qida zəhərlənməsi riskinin azaldılmasında mühüm rol oynayır.
