“Bolt” taksi platformasında tətbiq edilən “Priority” seçimi sərnişinlər arasında narazılıq yaradıb.
Gündəm24.az xəbər verir ki, bu barədə Afət Qayıbova adlı vətəndaş sosial şəbəkədə paylaşım edib.
Onun sözlərinə görə, əvvəllər tətbiqdə “Econom”, “Comfort” və “Business” seçimləri mövcud idi və hər kəs büdcəsinə uyğun taksi sifariş edə bilirdi. Lakin sonradan əlavə edilən “Priority” seçimi sərnişinləri daha bahalı sifarişlər etməyə məcbur qoyub.
Belə ki, yaxın məsafədə olan avtomobillər tez-tez tətbiqdə “Priority” kimi göstərilir və nəticədə “Econom” sifariş vermək mümkünsüzləşir. Daha uzaqda olan sürücülər isə yaxınlıqdakı “Priority” sifarişlərini gözlədikləri üçün adi sifarişləri qəbul etmir və ya qəbul etdikdən sonra müştəridən ləğv etməyi xahiş edirlər:
“Bəzi hallarda avtomobilinin nə, necə olmasından asılı olmayaraq taksi “Priority”ə düşür və bəzən qiymətləri “Comfort” sinfindən də baha olur. Təsəvvür edin, müştəri, bəlkə də, heç vaxt özünə “Comfort” taksi sifariş etməyə qıymamışdı… Amma indi sadəcə getdiyi yerə çatmalıdır deyə “Comfort”dan da baha qiymətə başa gələn “priority” ilə gedir. Onların etdiyi artıq çarəsizlikdən istifadədir”.
Şikayətçinin sözlərinə görə, xüsusilə tez-tez taksidən istifadə edənlər üçün bu dəyişiklik ciddi əlavə xərclərə səbəb olur:
“İndi sual yaranır: ümumiyyətlə, “Priority” sisteminin əsas məqsədi nə idi, xidməti yaxşılaşdırmaq, yoxsa adını “qiymət artımı” qoymadan qiymətləri dolayı yolla artırmaq?
Təklif edirəm ki, ya “Priority” sistemi ləğv edilsin və əvvəlki sistemə qayıdılsın, ya da ləğv edilmədiyi halda sürücü üçün “driver asked to cancel” seçimi istifadə edildikdə sürücülərə qarşı xüsusi penalti tətbiq olunsun və bu, onların reytinqinə təsir etsin.
Hazırkı vəziyyətdə sürücülər sistemdəki boşluqdan ciddi şəkildə sui-istifadə edirlər. Xahiş edirəm, bu məsələ ilə bağlı təcili tədbir görülsün” – deyə Afət Qayıbova bildirib.\Bakupost.az
