Azərbaycan Respublikası Ali Məhkəməsi müəssisədə mülkiyyətçinin dəyişməsi ilə bağlı əmək müqavilələrinin ləğvi məsələsinə aydınlıq gətirib.
Sfera.az xəbər verir ki, qərar bankda uzun illər çalışmış və son olaraq filial müdiri vəzifəsində işləyən şəxsin şikayəti əsasında qəbul olunub. Belə ki, həmin şəxsin əmək müqaviləsi 2020-ci ildə ləğv edilib. O, məhkəməyə müraciət edib və aşağı instansiya məhkəmələri onun xeyrinə qərar çıxararaq işə bərpasını təmin ediblər. Lakin daha sonra bankın səhmdar strukturunda dəyişiklik baş verib və işəgötürən bu dəfə “mülkiyyətçinin dəyişməsi” əsası ilə əmək müqaviləsinə yenidən xitam verib.
İşçi bu qərarla razılaşmayaraq yenidən məhkəməyə üz tutub və aşağı instansiyalar yenə onun xeyrinə qərar veriblər. Ali Məhkəmə isə bu mövqelə razılaşmayıb. Məhkəmə bildirib ki, Əmək Məcəlləsinə əsasən, müəssisənin mülkiyyətçisi dəyişdikdə, yeni sahibin idarəetmə və maliyyə sahəsində çalışan şəxslərlə əmək münasibətlərinə xitam vermək hüququ var.
Qərarda vurğulanıb ki, mülkiyyətçinin dəyişməsi təkcə müəssisənin satılması demək deyil. Əgər səhmdar strukturunda elə dəyişiklik baş verirsə ki, faktiki olaraq yeni sahib formalaşır, bu da mülkiyyətçinin dəyişməsi sayılır. Xüsusilə, müəssisədə 51 faiz və daha çox paya malik səhmdarın dəyişməsi bu hüququ yaradır. Məhkəmə iş üzrə müəyyən edib ki, bankda əsas səhmdarın payı 51 faizdən çox dəyişib və yeni təsisçilər daxil olub. Bu səbəbdən əmək müqaviləsinin ləğvi qanuni hesab edilib. Nəticədə Ali Məhkəmə aşağı instansiya məhkəmələrinin qərarını ləğv edərək iddianın rədd olunması barədə yekun qərar qəbul edib.
