Sumqayıt şəhərinin əksər hissəsində saatlardır ki, elektrik enerjisinin verilişində fasilə yaranıb.
NOCOMMENT.az-a müraciət edən şəhər sakinlərinin verdiyi məlumata görə, işıqların kəsilməsi yerli əhaliyə ciddi çətinliklər yaradıb, məişət və iaşə obyektlərinin fəaliyyətində problemlərə səbəb olub.
Müvafiq qurumlar tərəfindən hələlik məsələ ilə bağlı rəsmi səbəb və ətraflı açıqlama verilməsə də, sakinlər problemin operativ şəkildə aradan qaldırılmasını gözləyirlər.
Problemlər təkcə şəhər mərkəzi ilə məhdudlaşmır. Son günlər Sumqayıtın Corat qəsəbəsində, eləcə də yaxınlıqdakı Saray qəsəbəsində də elektrik enerjisinin verilişində tez-tez kəsintilər müşahidə olunur.
Abonentlərin sözlərinə görə, bəzi hallarda işıqlar saatlarla verilmir ki, bu da isti yay günlərində vətəndaşların narazılığını daha da artırır. Sakinlər enerji təchizatındakı bu cür fasilələrin səbəblərinin tezliklə aradan qaldırılmasını tələb edirlər.
