ABŞ-da 15 yaşlı yeniyetmə qız sosial şəbəkələrdə yayılan təhlükəli “Benadryl Challenge” trendinə qoşulduqdan sonra ağır vəziyyətə düşərək reanimasiyaya yerləşdirilib.
Sfera.az xəbər verir ki, hadisə ABŞ-ın Oklahoma ştatında qeydə alınıb. Məlumata görə, Leah Presson adlı 15 yaşlı qız allergiya əleyhinə dərmanın yüksək dozada qəbulundan sonra qıcolma keçirib və ürək fəaliyyəti dayanıb. Xəstəxanada aparılan müayinələr zamanı onun beyin fəaliyyətinin də müşahidə olunmadığı bildirilir.
Qeyd olunur ki, bu trend iştirakçıları “Benadryl” tərkibli dərmanı normadan artıq qəbul edərək halüsinasiyalar yaşamağa və həmin vəziyyəti video şəklində sosial şəbəkələrdə paylaşmağa təşviq edir.
ABŞ Qida və Dərman Administrasiyası (FDA) daha əvvəl bu cür hallarla bağlı xəbərdarlıq edərək dərmanın həddindən artıq dozasının ciddi ürək ritm pozğunluqları, qıcolma, koma və hətta ölümə səbəb ola biləcəyini bildirib.
Məlumata görə, “TikTok” və “YouTube” platformaları təhlükəli çağırışları təşviq edən məzmunların qaydaları pozduğunu və bu cür videoların silindiyini açıqlayıb.
Ailənin isə yeniyetmənin orqanlarını bağışlamağı düşündüyü bildirilir.
