ABŞ-nin Türkiyədəki səfiri Tom Barrakın ABŞ-Türkiyə münasibətlərindəki ən kritik düyün olan S-400 məsələsi ilə bağlı verdiyi sensasiyalı bəyanatlar Vaşinqtonun Ankara strategiyasında köklü dəyişikliklərin anonsu kimi qiymətləndirilir.
Gündəm24.az NOCOMMENT.az-a istinadən xəbər verir ki, səfir Türkiyənin NATO daxilindəki əvəzolunmaz hərbi gücünü və Avropanın müdafiəsindəki strateji rolunu xüsusi vurğulayaraq, S-400 sistemləri ətrafında yaranmış gərginliyin yaxın gələcəkdə tamamilə aradan qalxacağını bildirib.
Barrakın qənaətinə görə, illərdir tətbiq edilən sanksiyalar gözlənilən effekti verməyib, çünki bu cür məhdudiyyətlərlə üzləşən ölkələr daha “ağıllı və ixtiraçı” üsullarla sanksiyaları kənardan keçməyin yollarını tapırlar. Xüsusilə Türkiyənin F-35 qırıcıları proqramından çıxarılmasını və istehsal tərəfdaşlığının dayandırılmasını yanlış addım kimi qiymətləndirən diplomat, Prezident Trampın bu məsələdə olduqca açıq fikirli olduğunu və Türkiyənin yenidən proqrama qayıtmasını normal qəbul etdiyini diqqətə çatdırıb.
Səfir maraqlı bir müqayisə apararaq xatırladıb ki, Yunanıstanın arsenalında Rusiyaya məxsus S-300 sistemlərinin olması onların F-35 proqramında iştirakına maneə törətmir, bu isə Türkiyəyə qarşı tətbiq edilən standartların yenidən nəzərdən keçirilməsinin zəruriliyini göstərir.
Hazırda Tramp və Ərdoğan arasındakı birbaşa dialoqun nəticəsi olaraq “Halkbank” mövzusunun qapandığını və F-16 tədarükü ilə bağlı danışıqların müsbət məcrada davam etdiyini vurğulayan Barrak, yaxın vaxtlarda S-400 məsələsinin də hər iki tərəfi qane edəcək şəkildə həll olunacağını və Alyans daxilindəki birliyin tam bərpa ediləcəyini vəd edib. Bu bəyanatlar Vaşinqtonun regional təhlükəsizlik naminə Türkiyə ilə hərbi-texniki əməkdaşlığı bərpa etmək üçün artıq konkret yol xəritəsinə malik olduğunu sübut edir.
