Tayland, İndoneziya və Vyetnam Afrikada Ebola epidemiyası fonunda sərhəd və sanitar nəzarət tədbirlərini gücləndirib.
Ajans.az EFE agentliyinə istinadən xəbər verir ki, bir neçə Cənub-Şərqi Asiya ölkəsi yoluxmanın yayılma riskini azaltmaq məqsədilə hava limanlarında və sərhəd keçid məntəqələrində əlavə tədbirlər tətbiq edir.
Taylandın səhiyyə orqanları yaxın həftələrdə Konqo Demokratik Respublikası (KDR), Uqanda və digər yüksək riskli ölkələrdən gələn sərnişinlər üçün gücləndirilmiş tibbi yoxlamalar aparacağını bildirib. Eyni zamanda xəstəxanalara şübhəli halların izlənilməsi, xüsusi təcridxanaların hazırlanması və tibb işçilərinin qoruyucu vasitələrlə təmin olunması tapşırılıb.
İndoneziya Səhiyyə Nazirliyi Cakarta hökumətinin beynəlxalq koordinasiyanı gücləndirdiyini və xüsusilə hava limanlarında əlavə giriş yoxlamalarının tətbiq edildiyini açıqlayıb.
Vyetnamda da oxşar profilaktik tədbirlərin həyata keçirildiyi bildirilir.
Bundan əvvəl ABŞ da Uqanda, KDR və Cənubi Sudanı ziyarət etmiş səyahətçilər üçün əlavə sanitar nəzarət tədbirləri tətbiq etdiyini açıqlamışdı.
