Türkiyə Prezidenti Rəcəb Tayyip Ərdoğan ölkədə enerji sahəsində yeni böyük addımların atıldığını açıqlayıb.
Gündəm24.az NOCOMMENT.az-a istinadən xəbər verir ki, İstanbulda keçirilən beynəlxalq enerji sammitində çıxış edən Ərdoğan Diyarbəkirdə 4 yeni neft sahəsinin müəyyən edildiyini bildirib.
Onun sözlərinə görə, yaxın 3 il ərzində həmin ərazilərdə 24 quyuda qazma işləri aparılacaq.
Ərdoğan qeyd edib ki, Türkiyənin enerji sahəsində əldə etdiyi uğurlar ölkənin iqtisadi gücünü daha da artıracaq.
O vurğulayıb ki, Gabar bölgəsində hasil olunan neft hazırda Türkiyənin daxili neft istehsalının 44 faizini qarşılayır: “2016-cı ildə elan etdiyimiz qazma və axtarış fəaliyyətlərimiz digər mühüm uğurlarımızdan biridir. “Tapanlar yalnız axtaranlardır” şüarı ilə son 10 ildə bu sahəyə ciddi investisiyalar yatırdıq. Öz gəmilərimiz və öz avadanlıqlarımızla “Mavi Vətən”də fəaliyyət göstərdik. “Fatih” qazma gəmisi ilə Türkiyə Cümhuriyyəti tarixinin ən böyük kəşfini etdik. Müxalifətin kiçiltdiyi Sakarya yatağında hazırda 9,5 milyon kubmetr təbii qaz hasil edilir. Bu istehsal sayəsində milyonlarla evin enerji ehtiyacı qarşılanır. “Osmanqazi” platforması ilə gündəlik hasilatı 20 milyon kubmetrə çatdıracağıq. Beləliklə, 8 milyon evin ehtiyacı Qara dənizdən təmin olunacaq. İkinci üzən platformamızın tikintisi də davam edir. 2028-ci ildə həmin platforma istifadəyə veriləndən sonra gündəlik hasilat 45 milyon kubmetrə yüksələcək və 16-17 milyon ev bundan faydalanacaq”.
Türkiyə lideri həmçinin Qara dənizdə çıxarılan təbii qaz hesabına milyonlarla ailənin enerji təminatının gücləndiriləcəyini də açıqlayıb.
