“Ordunun quru qüvvələrinin əksəriyyəti ölkənin şimal-qərb, qərb, cənub-qərb, şərq, şimal-şərq və cənub-şərq sərhədlərində, xüsusən də Məkran sahillərində yerləşdirilib”.
Bunu İranın Quru Qoşunları komandanı Əli Cahanşahi deyib.
Onun sözlərinə görə, sərhəd bölgələrində xüsusi təyinatlı qüvvələr, sürətli reaksiya qüvvələri, xüsusi təyinatlı qüvvələr, mexanikləşdirilmiş və artilleriya bölmələri də daxil olmaqla müxtəlif quru qüvvələri bölmələri mövcuddur.
Musavat.com qeyd edir ki, İranın Azərbaycanla uzun sərhədi var. Ümumi uzunluğu 689 km-dir. Sərhədlərə qoşun yığılması o vaxta təsadüf edir ki, ABŞ lideri Donald Tramp müharibəyə son qoyacaq razılaşmanın əldə olunmaması halında İranı “məhv edə biləcəyi” barədə xəbərdarlıq edib.
Yeri gəlmişkən, İran aviaşirkətlərinə qarşı total təzyiqlər başlanıb. Bu ölkədən başqa dövlətlərə uçuş dayandırılır. Azərbaycana və Gürcüstana da uçuşlar yoxdur. Rəsmi Bakı İranda qalan vətəndaşlarının qayıdışı üçün quru sərhədi açıq qoyub. Hazırda cənub qonşumuzun yeni addımları növbəti müharibəyə hazırlıq kimi dəyərləndirilir. ABŞ-də keçiriləcək aralıq seçkilərinə qədər İrana növbəti bombardman gözlənilir. Çünki Hörmüz boğazında yaranmış vəziyyəti Vaşinqtonu qane etmir.
Fransa prezidenti Emmanuel Makron isə ABC kanalına müsahibəsində deyib ki, İrana zərbə endirmək ölkədə hakimiyyət dəyişikliyinə səbəb olmayacaq. “Düşünmürəm ki, bir ölkəni bombalamaqla rejim dəyişikliyinə nail ola bilərsiniz. Bu, məncə, yaxşı seçim deyil, işə yaramır. Və biz son onilliklərdə bu səhvi bir neçə dəfə etmişik. Fransa, sırf müdafiə xarakterli olması şərtilə, Hörmüz boğazından keçən gəmiçiliyin təhlükəsizliyini təmin etmək üçün beynəlxalq əməliyyatda iştirak edə bilər”, – o bildirib.
Bu arada, ABŞ və İran rəsmiləri çox yaxın gələcəkdə daha bir görüş keçirəcəklər. Tramp belə deyib. O bildirib ki, sentyabrın 22-də ABŞ və İran nümayəndələri Nyu Yorkda BMT Baş Assambleyasının 81-ci sessiyası çərçivəsində danışıqlar aparıblar. ABŞ prezidentinin xüsusi nümayəndəsi Stiv Uitkoff İran tərəfi ilə vasitəçilər üzərindən keçirilən məsləhətləşmələri uğurlu adlandırıb.
Onun sözlərinə görə, sentyabrın 22-də Nyu-Yorkda BMT Baş Assambleyasının 81-ci sessiyası çərçivəsində İran nümayəndə heyəti ilə vasitəçilər üzərindən uzunmüddətli danışıqlar aparılıb.
“Vasitəçilər gün ərzində tərəflər arasında əlaqə saxlayıblar. Ümid edirik ki, konstruktiv və perspektivli olacaq danışıqlar raundu uğurla başa çatıb. Vasitəçilər işi davam etdirəcəklər”, – Uitkoff qeyd edib.
