Yaxın Şərqdə kəskinləşən hərbi gərginlik fonunda İsrail ordusu (SADAQ) Livanın mülki və iqtisadi infrastrukturuna ağır zərbə endirib. Atəşkəs cəhdlərinə baxmayaraq, İsrail Hərbi Hava Qüvvələri ölkənin şərqində yerləşən ən böyük strateji obyekti hədəf alıb.
Gündəm24.az xəbər verir ki, İsrail ordusunun keçirdiyi son hava əməliyyatı zamanı Livanın cənubundakı Bəkaa vadisində yerləşən nəhəng “Qaraun” (Qaraoun) bəndi və su anbarı bombardman edilib. Zərbələr nəticəsində bəndin infrastrukturuna ciddi ziyan dəydiyi bildirilir.
“Qaraun” su anbarı Livanın ən mühüm həyat təminatlı obyektlərindən biri hesab olunur. 1959-cu ildə Litanı çayının orta axarında, Qaraun kəndi yaxınlığında inşa edilən bu bənd, 61 metr hündürlüyü ilə ölkənin ən böyük su bəndi statusunu daşıyır. Daş təmələ və beton xarici təbəqəyə malik olan bənd təkcə nəhəng su rezervuarı rolunu oynamır, həm də Livanın enerji təhlükəsizliyində kritik əhəmiyyət kəsb edir.
Belə ki, bu su anbarının resursları hesabına bölgədəki üç irihəcmli hidroelektrik stansiyası (HES) fəaliyyət göstərir ki, bu stansiyalar Livanın ümumi elektrik enerjisi istehlakının 7-10 faizini təkbaşına qarşılayır. Bundan əlavə, anbardan ölkənin cənub və şərq rayonlarının məişət su təchizatı, eləcə də minlərlə hektar kənd təsərrüfatı torpaqlarının suvarılması üçün istifadə olunur.
Yerli mənbələr və hərbi ekspertlər bəndin vurulmasını Livan üçün humanitar və iqtisadi fəlakət riski kimi qiymətləndirirlər. Strateji obyektin sıradan çıxması ölkədə onsuz da mövcud olan dərin enerji böhranını daha da kəskinləşdirə və geniş ərazilərin susuz qalmasına səbəb ola bilər./NOCOMMENT.az
