Bəzi iri neft şirkətləri ABŞ və İsrailin İrana qarşı hücumları, həmçinin Tehranın cavab addımları fonunda xam neft və yanacaq daşımalarını Hörmüz boğazı vasitəsilə müvəqqəti dayandırıb.
Gündəm24.az Globalinfo.az-a istinadən xəbər verir ki, bu barədə “Reuters” məlumat yayıb.
Boğaz Omanla İran arasında yerləşir və şimalda yerləşən Fars körfəzini cənubda Oman körfəzi və daha sonra Ərəb dənizi ilə birləşdirir. Dünyada istehlak olunan neftin təxminən beşdə biri məhz bu strateji su yolundan keçir.
“Gəmilərimiz bir neçə gün ərzində hərəkətsiz qalacaq”, – deyə iri ticarət şirkətlərindən birinin yüksək vəzifəli nümayəndəsi bildirib.
Avropa İttifaqının dəniz təhlükəsizliyi missiyası “EUNAVFOR Aspides” isə dənizçilik sənayesini ayıq-sayıq olmağa çağırıb və İrana endirilən zərbələrdən sonra gəmilərə hücum ehtimalının istisna edilmədiyini açıqlayıb.
Missiyanın bəyanatında bildirilib ki, mənbələr Yəməndə fəaliyyət göstərən husilərin Qırmızı dəniz və Ədən körfəzində İsrail və ABŞ-a məxsus gəmilərə qarşı yeni hücumlar həyata keçirə biləcəyi ilə bağlı hədələr səsləndirdiyini qeyd ediblər.
