Rusiyanın Murmansk vilayətinin Zapolyarnı şəhərində sakinlər son vaxtlar gecələr eşidilən qəribə uğultulardan şikayət etməyə başlayıblar. Yerli əhali səslərin dünyanın ən dərin quyusu hesab edilən Kola Superdərin Quyusundan gəldiyini düşünür.
Ajans.az SHOT teleqram kanalına istinadən xəbər verir ki, şəhərin bir neçə rayonunda gecə saatlarında naməlum səslər daha aydın eşidilir. Uzun illərdir bölgədə dolaşan əfsanələrdə iddia olunur ki, 1970-ci illərdə qazılan Kola Superdərin Quyusu “cəhənnəmə açılan qapı”dır və müəmmalı səslər məhz oradan gəlir.
Ərazi uzun müddətdir macəra həvəskarları və tədqiqatçıların diqqət mərkəzindədir. Tərk edilmiş obyektlər və anomal hadisələrlə maraqlanan şəxslər mütəmadi olaraq buraya səfər edirlər. Bu yaxınlarda Sankt-Peterburqdan gələn bir qrup gənc xüsusi həssas mikrofon vasitəsilə gecə səslərini qeydə almağa çalışıb. Onların sözlərinə görə, yazılarda qəribə titrəyişlər və uğultular eşidilib.
Lakin mütəxəssislər hadisənin mistik deyil, fiziki səbəblərlə bağlı olduğunu bildirirlər. Onların fikrincə, sakit və aydın gecələrdə Norveç istiqamətindən uçan təyyarələrin səsləri Zapolyarnıya qədər çata bilər. Bundan əlavə, uğultunun yaxınlıqdakı sənaye müəssisələrindən qaynaqlandığı da istisna edilmir.
