Rusiyanın və dünyanın ən dərin şirin sulu gölü olan Baykal gölündə göyərtəsində çoxlu sayda turistin olduğu hərbi-mülki təyinatlı “Xivus” (“Sever-750”) tipli hava yastıqlı kater qəzaya uğrayıb. Hadisə nəticəsində 5 nəfər boğularaq ölüb, xeyli sayda sərnişin isə xəsarət alıb.
Gündəm24.az xəbər verir ki, Rusiya Fövqəladə Hallar Nazirliyi və Buryatiya Prokurorluğunun yaydığı ilkin məlumatlara görə, faciə gölün “Çerepaha” (Tısbağa) qayalığı yaxınlığında, sahildən cəmi 30 metr məsafədə baş verib. Moskva ətrafından gələn turist qrupunu daşıyan katerin kapitanı gölün üzərindəki buz qatından qəfil suya tullanmaq (keçid etmək) manevri yerinə yetirmək istəyib. Təhlükəli manevr zamanı idarəetmədən çıxan sürət kateri sərnişinlərlə birlikdə suya aşaraq tərsinə çevrilib.
Qəza zamanı katerdə ümumilikdə 15-dən çox sərnişinin olduğu bildirilir. Xilasedicilər aralarında 14 yaşlı yeniyetmənin də olduğu 10 sərnişini sudan sağ çıxarmağı bacarıblar. Xilas edilən şəxslərin demək olar ki, hamısına kəskin donma və hipotermiya diaqnozu qoyulub, bir qadın isə ayağının ağır cırılmış yarası ilə xəstəxanaya yerləşdirilib. Kapitan da daxil olmaqla, su altında qalan 5 nəfərin isə cansız bədəni tapılıb.
İlkin araşdırmalara görə, qəzaya həm kapitanın təhlükəli manevri, həm də katerin normadan artıq yüklənməsi (tutumu maksimum 10 nəfər olduğu halda daha çox adam daşınması) səbəb olub. Faktla bağlı təhlükəsizlik tələblərinə cavab verməyən xidmətlərin göstərilməsi və insanların ölümünə səbəb olma maddələri ilə cinayət işi açılıb, hadisə yerində xüsusi dalğıc qrupları və müstəntiqlər işləyir./NOCOMMENT.az
