ABŞ Silahlı Qüvvələrinin Cənub Komandanlığı (SOUTHCOM) Sakit okeanın şərq hissəsində narkotiklərin qanunsuz dövriyyəsinə qarşı növbəti uğurlu əməliyyatını reallaşdırıb. Keçirilən kəskin hücum əməliyyatı nəticəsində narkotik qaçaqmalçılığı ilə məşğul olan sürət kateri sıradan çıxarılıb.
Gündəm24.az xəbər verir ki, SOUTHCOM-un yaydığı rəsmi məlumatda əməliyyat zamanı 3 “narkoterrorçu”nun məhv edildiyi bildirilir. ABŞ hərbçiləri qeyd edir ki, sözügedən qrup bölgədə narkotik vasitələrin daşınması ilə yanaşı, həm də terror fəaliyyətlərini maliyyələşdirən şəbəkənin üzvü olub.
Məlumata görə, əməliyyat beynəlxalq sularda strateji nəzarət həyata keçirilən zaman baş tutub. Qaçaqmalçılar hərbi dəniz qüvvələrinin “dayan” əmrinə tabe olmayaraq qaçmağa cəhd göstəriblər, bu isə hərbi gücün tətbiqini qaçılmaz edib. Atəş nəticəsində narkotik vasitələrlə dolu olan kater tamamilə məhv edilib.
Cənub Komandanlığı vurğulayır ki, regionda narkotrafiklə mübarizə təkcə cinayətkarlığa qarşı deyil, həm də milli təhlükəsizliyin qorunmasına yönəlmiş strateji addımdır. Son dövrlər Sakit okeanın bu istiqamətində narkotik kartellərinin aktivliyinin artması fonunda ABŞ-ın patrul və müdaxilə əməliyyatları daha da intensivləşdirilib.
Faktla bağlı araşdırmalar davam edir və bölgədəki digər mümkün şəbəkələrin müəyyən edilməsi istiqamətində kəşfiyyat işləri gücləndirilib./NOCOMMENT.az
