“Azərbaycan və Ermənistan arasında sülh sazişinin payız aylarında imzalanması ehtimalı tam istisna olunmasa da, bunu hələlik yüksək ehtimal kimi qiymətləndirmək düzgün deyil”.
Politoloq Züriyyə Qarayeva bu fikri KONKRET.az-a açıqlamasında səsləndirib.
“Sülh sazişinin mətni üzrə artıq ciddi irəliləyiş əldə olunub. 2025-ci ilin avqustunda Vaşinqtonda razılaşdırılmış mətn paraflansa da, bu, sənədin rəsmi şəkildə imzalanması və ratifikasiya olunması anlamına gəlmir.
Prosesin qarşısında duran əsas maneələrdən biri Ermənistan Konstitusiyası ilə bağlı məsələdir. Bakı hesab edir ki, Ermənistanın hüquqi sənədlərində Azərbaycana qarşı ərazi iddiası kimi yozula biləcək müddəalar qalmaqdadır və bu məsələ aradan qaldırılmadan yekun imzanın atılması riskli görünür”.
Politoloqun fikrincə, son proseslər sülh gündəliyinin tam dayanmadığını göstərir.
“Sərhədin delimitasiyasının davam etdirilməsi ilə bağlı razılaşmalar, Türkiyə-Ermənistan münasibətlərinin normallaşdırılması istiqamətində atılan kiçik praktik addımlar və regionda kommunikasiyaların açılması ilə bağlı müzakirələr payıza qədər diplomatik dinamikanı sürətləndirə bilər. Bununla yanaşı, siyasi təzyiqlərin, Ermənistanın Rusiya-Qərb xəttində manevrlərinin, həmçinin əsirlər və Qarabağ erməniləri mövzusunun beynəlxalq platformalarda gündəmdə saxlanılmasının prosesi yenidən ləngidə biləcəyini də diqqətə çatdırıb”.
Z.Qarayeva hesab edir ki, payız aylarında sülh sazişinin imzalanması mümkün olsa da, daha real ssenari həmin dövrün yekun razılaşmadan daha çox imzaya aparan son siyasi hazırlıq mərhələsi kimi yadda qalmasıdır.
