Hörmüz boğazında yaranan gərginlik Türkiyə iqtisadiyyatına ciddi maliyyə yükü gətirə bilər. Enerji bazarlarında baş verən dalğalanmalar fonunda rəsmi Ankara artıq mümkün itkiləri hesablayıb.
Gündəm24.az xəbər verir ki, Türkiyənin energetika və təbii sərvətlər naziri Alparslan Bayraktar bildirib ki, neftin qiymətindən asılı olaraq ölkənin əlavə xərcləri 13,6 milyard dollardan 24 milyard dollara qədər arta bilər.
Onun sözlərinə görə, əgər “qara qızıl”ın bir barelinin orta qiyməti 100 dollar səviyyəsində qalarsa, ilin sonuna qədər əlavə xərclər 13,6 milyard dollar təşkil edəcək. Qiymət 125 dollara yüksələrsə, bu rəqəm 24 milyard dollara çatacaq.
Nazir qeyd edib ki, Hörmüz boğazı ətrafında yaranan böhran yalnız xərclərin artması ilə məhdudlaşmır. Belə ki, bu vəziyyət Türkiyə büdcəsinin vergi daxilolmalarına da mənfi təsir göstərəcək. Hesablamalara görə, dövlət büdcəsi təxminən 600 milyard türk lirəsi (təxminən 13,3 milyard dollar) həcmində vergi gəlirindən məhrum ola bilər.
Ekspertlər hesab edir ki, qlobal enerji marşrutlarının təhlükə altına düşməsi region ölkələri üçün əlavə iqtisadi risklər yaradır və bu prosesin davam etməsi Türkiyə iqtisadiyyatına daha geniş təsir göstərəcək./KONKRET.az
