Beynəlxalq Atom Enerjisi Agentliyi (MAQATE) Ukrayna və Rusiya arasında müvəqqəti yerli atəşkəs barədə razılıq əldə olunduğunu elan edib.
Gündəm24.az xəbər verir ki, bu barədə MAQATE-nin “X” sosial şəbəkə hesabında edilən paylaşımda məlumat verilib.
Bildirilir ki, bu, ötən ilin sonundan bəri əldə edilən sayca altıncı atəşkəsdir. Sözügedən addım Ukraynanın Zaporojye Atom Elektrik Stansiyasının (ZAES) elektrik təchizatı xəttində zəruri təmir işlərinin aparılmasına imkan verəcək.
Agentliyin bəyanatında deyilir:
“Bu gün Zaporojye Atom Elektrik Stansiyası yaxınlığındakı cəbhə xəttində MAQATE-nin vasitəçiliyi ilə yerli atəşkəs qüvvəyə minib. Bu addım nüvə qəzası təhlükəsinin qarşısını almaq üçün mühüm əhəmiyyət kəsb edən elektrik xəttinin təmirinə şərait yaradır”.
Məlumata görə, yaxın günlərdə hər iki tərəfin texnikləri ərazinin geniş şəkildə minalardan təmizlənməsi prosesindən sonra müharibə nəticəsində zədələnmiş 750 kilovoltluq “Dniprovska” elektrik xəttinin təmirinə başlayacaqlar.
Paylaşımda qeyd olunub ki, sözügedən elektrik xətti iki aydan çoxdur ki, şəbəkədən ayrılıb. Nəticədə Avropanın ən böyük atom elektrik stansiyası fəaliyyəti dayandırılmış altı reaktorunun soyudulması üçün tələb olunan elektrik enerjisini cəmi bir 330 kV-luq xətt vasitəsilə təmin etmək məcburiyyətində qalıb.
MAQATE-nin bildirdiyinə görə, ZAES son həftələrdə bu xəttə çıxışı da bir neçə dəfə itirib və bu səbəbdən stansiya qəza dizel generatorlarını işə salmaq məcburiyyətində qalıb.
