Xəzər rayonunun Mərdəkan qəsəbəsində dörd nəfər suda boğularaq həyatını itirib.
Məlumata görə, bir araya gələn dörd dost yeyib-içdikdən sonra hava şəraitinin küləkli olmasına baxmayaraq, dənizə giriblər. Bir müddət sonra onların hamısı suda batıb.
Fövqəladə Hallar Nazirliyinin (FHN) şöbə rəisi Akşin Əlili Baku TV-yə açıqlamasında bildirib ki, qurum tərəfindən aparılan kütləvi maarifləndirmə işlərinə baxmayaraq, hələ də bəzi vətəndaşlar küləkli havada, dalğalı dənizdə, həmçinin nəzarətsiz və çimərlik üçün nəzərdə tutulmayan ərazilərdə suya girirlər. Bu cür davranışlar isə acı sonluqla nəticələnir:
“Nəzarətsiz qeyri-çimərlik əraziləri mürəkkəb relyefə, güclü axına, məhdud görünüşə və digər təhlükəli xüsusiyyətlərə malikdir. Bu səbəbdən həmin ərazilərdən istifadə edən insanların həyat və sağlamlığı ciddi risk altındadır. Əhalini bir daha xəbərdar edirik ki, yalnız xilasedicilərin nəzarət etdiyi çimərliklərdən istifadə etsinlər və xilasedicilərin çağırış və tələblərinə ciddi riayət etsinlər”.
Axtarışlar nəticəsində dalğıc-xilasedicilər tərəfindən 2007-ci il təvəllüdlü Elmar İsa oğlu Əbdülovun meyiti suda tapılıb çıxarılaraq aidiyyəti üzrə təhvil verilib.
Dənizdə batan dördüncü şəxs – 2003-cü il təvəllüdlü Pərviz Zöhrab oğlu Məcidovun axtarışları davam etdirilir.
Əlavə məlumat veriləcək.
