Noyabr ayında yağışsız və ilıq keçən hava şəraiti artıq əhali arasında narahatlıq yaradıb. Mütəxəssislər bildirirlər ki, bu tip anormal iqlim dəyişiklikləri, xüsusilə böyük şəhərlərdə yaşayanların sağlamlığı üçün əlavə risklər yarada bilər.
Bu cür hava şəraiti insan səhhəti üçün təhlükə vəd edirmi?
Gündəm24.az Globalinfo.az-a istinadən xeber verir ki, tibb elmləri doktoru, professor Adil Qeybulla deyib ki, hazırda bütün dünyada iqlim dəyişir:
“Qlobal istiləşmə” kimi adlandırılan, əslində Yer kürəsinin istilik tənzimləmə mexanizmlərinin pozulması ilə xarakterizə olunan bu prosesin həm planetin florası və faunası, həm də insanların səhhətinə ciddi təsirləri var. Bu gün baş verənlər daha çox insan fəaliyyəti – fosil yanacaqların həddindən artıq istifadəsi, antropogen təsirlər, sürətli əhali artımı ilə əlaqədardır. Həmçinin atmosferin çirklənməsi, o cümlədən karbon qazı və polisiklik aromatik birləşmələrin artması da burada rol oynayır”.
Adil Qeybulla
Professor bildirib ki, atmosferdə zərərli qazların və hissəciklərin çoxalması tənəffüs yolları xəstəliklərinin yayılma riskini artırır.
“Havanın keyfiyyətinin pisləşməsi xüsusilə uşaqlar, yaşlılar və xroniki xəstəliyi olan şəxslər üçün əlavə sağlamlıq yükü yaradır. İqlim dəyişikliyi ilə əlaqəli temperatur artımı günvurma, istilik stressi və susuzlaşma hallarının çoxalmasına səbəb olur. Rütubətin və temperaturun dəyişməsi bəzi yoluxucu xəstəliklərin yayılma arealını genişləndirə bilər. Ekosistemlərdəki fərqliliyin qida təhlükəsizliyinə, insanların ümumi immun sağlamlığına dolayı təsirlər göstərməsi mümkündür”.
Terapevt Aygün Sayılova qeyd edib ki, payız fəslinin yağışsız və həddən artıq quru keçməsi bir sıra sağlamlıq problemləri yaradır:
Aygün Sayılova
“Quru hava tənəffüs yollarının selikli qişasını qurudur, bu isə virus və bakteriyaların orqanizmə daha asan daxil olmasına şərait yaradır. Allergik xəstəliklər, xüsusən də toz və qurumuş bitki qalıqlarından yaranan allergiyalar daha tez-tez müşahidə olunur. Belə vəziyyətdə dəri quruluğu, çatlamalar və ekzema halları da artır. Eyni zamanda, atmosfer təzyiqinin sabit olmaması baş ağrıları və xroniki xəstəlikləri olanlarda narahatlığı gücləndirə, oksigenin nisbətən azalması isə ürək-damar sisteminə yük sala bilər. Belə günlərdə daha çox maye qəbul edilməli və qapalı məkanlar tez-tez havalandırılmalıdır”.
