Azərbaycanda bəzi avtomobil sahiblərinin ən çox narazılıq etdiyi məsələlərdən biri də icbari sığorta müddətinin başa çatması ilə bağlı tətbiq olunan cərimələrdir. Bir çox sürücü iddia edir ki, sığortanın bitməsinə az qalmış onlara heç bir SMS, bildiriş və ya məlumat xarakterli xəbərdarlıq göndərilmir. Nəticədə sürücülər sığorta müddətinin başa çatdığını bilmədən avtomobildən istifadə edir və qısa müddət sonra avtomatik şəkildə 50 manat cərimə ilə üzləşirlər.
Xüsusilə elektron nəzarət sistemlərinin geniş tətbiq olunduğu dövrdə avtomobil sahibləri hesab edir ki, sığorta müddəti bitdikdən sonra xəbərdarlıq mexanizmi tətbiq etdilməlidir. Bəzi sürücülər isə bildirirlər ki, məqsəd vətəndaşı məlumatlandırmaq yox, daha çox cərimə tətbiq etməkdir.
Məsələ ilə bağlı Sfera.az saytına açıqlama verən nəqliyyat eksperti Raqif Raufoğlu bildirib ki, sığortanın bitməsinə az qalmış xəbərdarlıq mesajı sürücülərə göndərilir.
Onun sözlərinə görə, 1 ay öncədən sürücülər bu barədə xəbərdar olurlar.
Ekspert qeyd edib ki, istisna hallarda bu cür xəbərdarlıq mesajı gəlməyə bilər:
“Nəqliyyat vasitəsi həmin şəxsin adına olmadıqda, nömrəsi orda qeydiyyatda olmadıqda, hər hansısa başqa bir nömrə ilə qeydiyyata salındıqda, kiməsə etibarnamə verildikdə, həmin şəxs xəbərdarlıq mesajı almaya bilər. Amma hər şey qaydasında olduqda, 1 ay öncədən xəbərdarlıq mesajı gəlir”.
