"Dünyada gedən proseslərin gözlənilməzliyini nəzərə alaraq, Azərbaycan hər an müharibəyə hazır olmalıdır".

Gundem24.az xəbər verir ki, bunu Azərbaycan Prezidenti İlham Əliyev Kəlbəcərə səfəri zamanı sakinlərlə görüşündə deyib.

“Təbii ki, Silahlı Qüvvələrimiz hər dəqiqə, hər gün dövlətimizin mənafeyinin və təhlükəsizliyinin keşiyində dayanır, mümkün təhlükə mənbələrini müşahidə edirik, görürük və görəcəyik. Biz hərbi gücümüzü artırırıq. İkinci Qarabağ Müharibəsindən sonra bütün Silahlı Qüvvələrdə qüvvələrimizin inkişafı ilə əlaqədar olaraq xüsusi təyinatlılarımızın sayını minlərlə döyüşçü ilə artırdıq - mən dəqiq rəqəm vermək istəmirəm, amma onların sayı xeylidir, yeni komando qüvvələri yaradıldı.

Ölkəmizə ən müasir pilotsuz uçuş aparatları, yeni artilleriya sistemləri gətirilib. Yeni döyüş təyyarələrinin alınması ilə bağlı müqavilələr imzalanıb, mövcud olanlar tamamilə modernləşdirilib. Biz hər an müharibəyə hazır olmalıyıq, çünki dünyada hadisələrin gedişatı elədir ki, sabah nə olacağını proqnozlaşdırmaq mümkün deyil. Təhlükəsizliyimizin qarantı özümüzdür, dövlətimiz, xalqımız və Silahlı Qüvvələrimizdir. Ona görə də kiminsə xəstə başında Azərbaycana qarşı hansısa təxribat törətmək fikri gəlsə, məncə, yenə peşman olacaqlar. Biz bundan sonra da qalib xalq, qalib dövlət kimi yaşayacağıq”, - dövlət başçısı vurğulayıb.

Oxunub: 12