“Prezident İlham Əliyevin Ermənistanda Rusiyanın hərbi bazasının olması, İran və Türkiyə ilə sərhədlərin Rusiyanın sərhədçiləri tərəfindən qorunması ilə bağlı mesajının çox mənaları var. Çünki biz Ermənistanın nə fikirləşdiyini deyə bilmərik. O cümlədən, Rusiyanın Ermənistanın daxilində hansı ssenariləri icra edə biləcəyi ehtimalı ilə bağlı da heç nə deyə bilmərik. Ancaq Rusiyanın ruporları Ermənistanda Rusiya hərbçilərinin iştirakı ilə hərbi təlimlərin keçiriləcəyi ilə bağlı danışırlar. Təbii ki, belə fikirlər Kremlin tapşırığı ilə səsləndirilir”.

Bunu Demokrat.az-a açıqlamasında millət vəkili Azər Badamov deyib. O bildirib ki, dövlət başçımızın müsahibəsində səsləndirdiyi fikirlərdə Azərbaycanla Ermənistan arasında sülh müqaviləsinin paraflanmasının ABŞ-nin iştirakı ilə baş verməsi qeyd olunur:


“Vaşinqton səfərinə qədər sülhün əldə olunması ilə bağlı Ermənistandan konstruktiv addımları görmürdük. Amma Vaşinqton səfəri bütün gündəliyi sülhə köklədi, Minsk qrupunun buraxılması ilə bağlı birgə müraciət göndərildi, TRİPP dəhlizinin açılması ilə bağlı tələbimizi Ermənistan qəbul etdi. Zəngəzur dəhlizinin açılması və yekun sülhün imzalanması Donald Trampın təşəbbüsündən sonra təsdiqini tapmışdır. Əgər Ermənistan Rusiyanın dəstəyi ilə fikirlərini dəyişərsə, bu, ABŞ-a və bütün dünya ictimaiyyətinə hörmətsizlik olar. Bu baxımdan, Rusiyanın Ermənistan ərazisindən təxribatların törədilməsi ehtimalı aşağıdır, amma tam şəkildə sovuşmadığını hesab edirəm.

Azərbaycan ərazisində nə Rusiyanın, nə də başqa hər hansı bir dövlətin hərbi mövcudluğu yoxdur. Azərbaycan Ordusu baş verə biləcək hər bir təxribata hazırdır və ərazilərin suverenliyini müdafiə etməyə qadirdir. Təbii ki, biz sülh müqaviləsinin imzalanacağına və sülhün yaranacağına arxayın ola bilmərik. Bu baxımdan, Azərbaycan hər bir ssenariyə cavab verməyə hər an hazır olmalıdır”.

Oxunub: 4