Türkiyə Rusiyanın rəsmi razılığı olmadan S-400 sistemlərinin başqa ölkələrə təhvil verilməsinin mümkün olmadığını bilir.
Gündəm24.az musavat.com-a istinadən bildirir ki, bunu Rusiyanın xarici işlər naziri Sergey Lavrov Nyu-Yorkda keçirilən mətbuat konfransında jurnalistlərin suallarını cavablandırarkən deyib.
Nazir qeyd edib ki, Ankaradan bununla bağlı hər hansı müraciət alınmayıb: “S-400 sistemləri müqavilənin sonuna qədər son istifadəçi sertifikatına tam uyğunluğu nəzərdə tutan müqavilə çərçivəsində təhvil verilib. Onlar yaxşı bilirlər ki, əgər bu sistemləri öz sərhədlərindən kənara çıxarmaq istəsələr, bunu bizim rəsmi razılığımız olmadan edə bilməzlər. Bizə belə bir sorğu gəlməyib, heç vaxt”.
O qeyd edib ki, Rusiya S-400 sistemlərinin Türkiyədən başqa ölkəyə təhvil verilməsi ehtimalını nəzərdən keçirməyə hazırdır, lakin bu, yalnız Rusiyanın razılığı ilə və yalnız tam etibar edə biləcəyi bir ölkəyə mümkündür: “Biz istənilən təklifi nəzərdən keçirəcəyik. Mən indi bu barədə şərh verməyəcəyəm, amma bu cür imkanlar yalnız bizim razılığımızla mövcuddur, bir şərtlə ki, bu S-400 sistemlərinin göndərilə biləcəyi ölkə məsuliyyətli və Rusiya Federasiyası ilə dostluq şərtləri əsasında olsun, beləliklə, bu sistemlərin həmin ölkədən kənara çıxarılmayacağına əmin ola bilərik”.
