Qərbi Azərbaycan İcmasının təşkilatçılığı ilə keçirilən “Mədəni irs və qayıdış hüququ” mövzusunda III beynəlxalq konfrans çərçivəsində IV panel beynəlxalq əməkdaşlıq və qlobal dəstəyin səfərbər olunması məsələlərinə həsr edilib.
Panelin moderatoru ABŞ-ın Qrinsboro Universitetinin Sülh və Münaqişə Araşdırmaları Departamentinin professoru Prof. Ali Kaan Asker olub.
Paneldə Türkiyədən Milli Müdafiə Universitetinin Quru Qoşunları Hərbi Məktəbinin dekanı Dr. İbrahim Ethem Atnur, Almaniyadan BWA Qlobal İqtisadi Şəbəkənin Federal İdarəedici Direktoru Urs Emil Unkauf, Latviyadan Nəqliyyat və Telekommunikasiya İnstitutunun professoru Prof. Juris Maklakovs, həmçinin Qırğızıstandan Qırğız Milli Universitetinin Türk İrsi Mərkəzinin rəhbəri Dr. Kairat Osmonaliyev çıxış ediblər.
Çıxışlarda beynəlxalq hüquq, akademik əməkdaşlıq və mədəni diplomatiya vasitəsilə Ermənistandan didərgin salınmış azərbaycanlıların qayıdış hüququnun təşviqi, eləcə də onların mədəni irsinin qorunması məsələləri müzakirə olunub. Panel iştirakçıları bu mövzunun beynəlxalq ictimaiyyət üçün qlobal məsuliyyət daşıdığını vurğulayaraq, dövlətlər, akademik institutlar və vətəndaş cəmiyyəti arasında koordinasiyalı əməkdaşlığın vacibliyini qeyd ediblər.
Müzakirələr zamanı beynəlxalq platformalarda Qərbi Azərbaycan məsələsinin daha sistemli şəkildə təqdim olunmasının, qlobal ekspert şəbəkələrinin formalaşdırılmasının və mədəni irsin qorunmasının dayanıqlı sülhə töhfə verdiyi diqqətə çatdırılıb.
