Mustafa Sandaldan həyat yoldaşı ilə bağlı araşdırmaya AÇIQLAMA
Gündəm24.az xəbər verir ki, Türkiyəli müğənni Mustafa Sandal maliyyə araşdırması çərçivəsində həbs qərarı verilən həyat yoldaşı Melis Sütşurup Sandal barədə birbaşa açıqlama verməyib.
Sandal Ankarada keçirilən konserti zamanı özünün maliyyə fəaliyyətindən danışaraq heç vaxt fond almadığını, satmadığını və hər hansı fonda iştirak etmədiyini bildirib.
“Mənim yeganə gəlir mənbəyim musiqidir. Heç vaxt, heç bir halda heç bir fond almamışam, satmamışam və ya heç bir fonda iştirak etməmişəm. Bunu hər birinizə gözlərinizin içinə baxaraq deyirəm. 33 ildir ki, sizin minnətdarlığınız sayəsində yeganə gəlir mənbəyim musiqidir. Başqa gəlir mənbəyim yoxdur”, – deyə müğənni bildirib.
Sandal çıxışının davamında diqqətçəkən ifadə işlədib:
“Əgər tez bir zamanda bir yerə çatmaq niyyətində olsaydım, sizinlə bu münasibəti qurmağa 33 il sərf etməzdim.”
Qeyd edək ki, İstanbul Baş Prokurorluğunun apardığı maliyyə araşdırması çərçivəsində Melis Sütşurup Sandal və atası Cihan Sütşurup barəsində həbs qərarı verildiyi və onların aktivlərinin müsadirə edildiyi bildirilir.
Mustafa Sandal isə daha əvvəl məsələ ilə bağlı “vicdanım təmizdir” açıqlamasını vermişdi.
Melis Sütşurup Sandal 1989-cu ildə İstanbulda anadan olub. Moda və pərakəndə satış sahəsində fəaliyyət göstərən iş qadınıdır. Mustafa Sandal və Melis Sütşurup 2022-ci ildə İtaliyanın Roma şəhərində evləniblər.
Sədaqət Həsənova
Gündəm24.az
