Rusiya Prezidenti Vladimir Putin İran Prezidenti Məsud Pezeşkianın razılığı ilə mümkün münaqişə nizamlanmasına dair Tehranın mövqeyini ABŞ Prezidenti Donald Trampa çatdırıb.
Gündəm24.az sfera.az-a istinadən xəbər verir ki, bu barədə Rusiya prezidentinin mətbuat katibi Dmitri Peskov “RİA Novosti”yə açıqlamasında bildirib.
Kremlin nümayəndəsinin sözlərinə görə, Putin və Pezeşkian Türkmənistanda keçirilən sammit çərçivəsində iki dəfə görüşüblər. Görüşlərdən birində Rusiya lideri iranlı həmkarına Trampla planlaşdırılan telefon danışığı barədə məlumat verib.
Peskovun sözlərinə görə, daha sonra İran prezidentinin razılığı ilə Putin mümkün münaqişə həllinə dair İran tərəfinin mövqeyini Trampla bölüşüb.
Qeyd edək ki, Türkmənistanda Putin Pezeşkianla ayrıca görüş də keçirib. Bundan başqa, MDB və Xəzər Ətraf Mühit Sammitləri çərçivəsində Rusiya, İran və Azərbaycan liderlərinin üçtərəfli görüşü baş tutub.
