“Ramiz Mehdiyevin daha bir dəhşətli cinayəti barədə məlumat verəcəyəm. Bu, Milli Ensiklopediya cinayətidir”.
Gündəm24.az yenisabah-a istinadla xəbər verir ki, bu açıqlama ilə keçmiş millət vəkili Etibar Əliyev çıxış edib.
O, bildirib ki, Azərbaycan Milli Ensiklopediyasının nəşri haqqında Azərbaycan Respublikası Prezidentinin 2004-cü il 12 yanvar tarixli, 55 saylı Sərəncamında deyilir: “Azərbaycanın öz dövlət müstəqilliyini bərpa etməsi ilə yeni dövrün tələblərinə cavab verən, xalqımızın həyatında baş vermiş mühüm ictimai-siyasi, tarixi, elmi və mədəni hadisələri obyektiv şəkildə əks etdirən yeni ensiklopediyanın hazırlanıb latın qrafikasında nəşr edilməsi zərurəti meydana çıxmışdır”.
E. Əliyev qeyd edib ki, ensiklopediyanın nəşri işinə Ramiz Mehdiyev rəhbərlik edib:
“Sərəncamda Ensiklopediyanın nəşri Dövlət əhəmiyyətli mühüm iş kimi təsnifatlandırılmış və qərar hissəsində qeyd edilmişdir ki, 2004-2008-ci illərdə çoxcildli Azərbaycan Milli Ensiklopediyası nəşr edilsin.
Çoxcildli Azərbaycan Milli Ensiklopediyasının nəşri üçün normal iş şəraitinin yaradılması məqsədilə Prezident İlham Əliyevin 5 may 2004-cü il tarixli Sərəncamı ilə Azərbaycan Milli Ensiklopediyası” Elmi Mərkəzi” təsis edilmişdir.
Sərəncamın imzalanmasından 21 il ötməsinə baxmayaraq Ensiklopediyanın cəmi 9 cildi çapdan çıxıb.
Əlbəttə ki, bu işə məsul şəxs Ramiz Mehdiyev idi. “Azərbaycan Milli Ensiklopediyası” Elmi Mərkəzi tikilib istifadəyə veriləndən dərhal sonra R. Mehdiyev binanın iki mərtəbəsini oğluna məxsus olan “Şərq – Qərb” nəşriyyatına verdi.
Prezident Sərəncamında Milli Ensiklopediyanın nəşri dövlət əhəmiyyətli iş sayılır. Lakin Mehdiyev bu dövlət əhəmiyyətli işi, belə vacib layihəni urvatsız hala saldı. Ensiklopediyanın məzmununda yol verilən çox ciddi xətalara (plagiatlıq, tərcümə qüsurları, anlayışların düzgün verilməməsi. Milli maraqlarımıza zidd məqalələr) görə 2018-ci ildə onun adına məktub yazdım. Lakin məktuba cavab verilmədi. Sonradan anladım ki, bu işlər məqsədli şəkildə həyata keçirilir.
Ölkələr bütün dövrlərdə öz intellektual potensiallarını önə çəkiblər, bu da bir yarış kimi tarixə düşüb. İntellektual potensial isə Milli Ensiklopediyada təcəssüm olunur.
Ramiz Mehdiyevin Ensiklopediyaya düşmən münasibəti sayəsində Azərbaycan ziyalıları və sadə vətəndaşların Ensiklopediya barədə bilgiləri demək olar ki, yoxdur.
Qalib Xalqın Milli Ensiklopediyasına xəyanət etmək də Dövləti cinayətdir”.
