Mariya Zaxarova bildirib ki, Rusiya bu qoşunlara qanuni hərbi hədəf kimi yanaşacaq.
Gündəm24.az xəbər verir ki, TASS Agentliyinin məlumatına görə, Rusiya Qərb qoşunlarının Ukraynaya yerləşdirilməsini tamamilə qəbuledilməz hesab edir. Rusiya Xarici İşlər Nazirliyinin sözçüsü Mariya Zaxarova brifinqdə NATO-nun baş katibi Mark Ruttenin Ukraynaya sözdə “könüllülər koalisiyası”ndan qoşun göndərmək planlarına cavab olaraq bildirib: “Bu, bizim üçün qəti şəkildə qəbuledilməzdir”.
O, Rusiyanın uzun müddətli mövqeyini təkrarlayaraq vurğulayıb: “Rusiya dəfələrlə açıq şəkildə bildirib ki, Ukrayna torpağında istənilən bayraq altında Qərb qoşunlarının mövcudluğu təhlükəsizliyimizi təhdid edir. Biz bu qoşunlara qanuni hərbi hədəflər kimi yanaşacağıq”.
Zaxarova xatırladıb ki, münaqişənin əsas səbəblərindən biri NATO-nun sərhədlərimizə, o cümlədən Ukraynaya qədər genişlənməsi olub və bunu aradan qaldırmadan problemin həlli mümkün deyil. O, həmçinin qeyd edib ki, Moskva bu məsələni hərbi və siyasi yollarla həll etmək üçün müxtəlif variantlar təklif edir.
Sədaqət Həsənova
