Gündəm24.az xəbər verir ki, aprelin 24-də Sumqayıt Dövlət Universiteti-də “Qərbi Azərbaycan irsini tanı” layihəsi çərçivəsində “Qərbi Azərbaycana qayıdış: tarixi həqiqətlər, innovativ yanaşma və maarifləndirmə” mövzusunda seminar keçirilib. Tədbir Azərbaycan Respublikası Mədəniyyət Nazirliyi-nin maliyyə dəstəyi, nazirliyin Mədəniyyət üzrə Elmi-Metodiki və İxtisasartırma Mərkəzi və Qərbi Azərbaycan İcması-nın tərəfdaşlığı, İRƏLİ İctimai Birliyi-nin təşkilatçılığı ilə baş tutub.
Seminar “İRƏLİ” İB-nin baş katibi Riad Cəbrayılov-un moderatorluğu ilə keçirilib. Tədbir Ümummilli Lider Heydər Əliyev-in və Vətən uğrunda canından keçmiş şəhidlərin xatirəsinin bir dəqiqəlik sükutla yad olunması ilə başlayıb. Universitetin Sosial məsələlər və ictimaiyyətlə əlaqələr üzrə prorektoru, dosent Elmar Xəlilov çıxışında layihənin tarixi əhəmiyyətini vurğulayaraq bildirib ki, erməni millətçilərinin azərbaycanlılara qarşı həyata keçirdiyi etnik təmizləmə və deportasiya siyasəti tariximizin faciəli səhifələrindəndir.
Qeyd olunub ki, 1905-ci il hadisələri və 1918-ci il qırğınları, həmçinin 1948–1953-cü illər deportasiyaları bu siyasətin tərkib hissəsidir. Ermənistanın təcavüzü nəticəsində bir milyondan çox azərbaycanlı doğma yurdlarından didərgin düşüb. Diqqətə çatdırılıb ki, İkinci Qarabağ müharibəsi zamanı qazanılan qələbə ilə torpaqlarımız azad olunub və hazırda “Böyük Qayıdış” Dövlət Proqramı uğurla icra edilir. Bu çərçivədə Qərbi Azərbaycanın mədəni irsinin qorunması və gənclər arasında maarifləndirilməsi xüsusi əhəmiyyət daşıyır.
Daha sonra çıxış edən Riad Cəbrayılov rəhbərlik etdiyi qurumun fəaliyyəti, eləcə də Qərbi Azərbaycan irsinin təbliği istiqamətində həyata keçirilən layihələr – konfranslar, festivallar, düşərgələr və infosessiyalar barədə ətraflı məlumat verib.
Seminarda Qərbi Azərbaycan İcmasının Sumqayıt şəhəri Corat qəsəbəsi üzrə nümayəndəliyinin sədri Nazim Hüseynov və gənclər təşkilatının sədri Fuad Məmmədov çıxış edərək Ümummilli Lider Heydər Əliyevin xilaskarlıq missiyasından, Prezident İlham Əliyev-in Qərbi azərbaycanlıların qayıdışı istiqamətində həyata keçirdiyi siyasətdən və formalaşan Qayıdış Konsepsiyasından bəhs ediblər.
SDU-nun İctimaiyyətlə əlaqələr və Kommunikasiya şöbəsinin baş mütəxəssisi Şükür Əliyev universitetdə bu istiqamətdə keçirilən tədbirlər, tələbələrin iştirakı ilə təşkil olunan debatlar, seminarlar və maarifləndirici layihələr barədə məlumat verib.
Sonda Azərbaycan Milli Konservatoriyası və Azərbaycan Dövlət Mədəniyyət və İncəsənət Universiteti-nin magistrantlarının ifasında “Mənim Azərbaycanım”, “Qarabağ” və “Mehriban olaq” mahnıları səsləndirilib, həmçinin SDU tələbəsinin ifasında aşıq havası təqdim olunub.
