ABŞ ordusu narkotik daşıdığı iddia edilən gəmiyə hücum etdi, bir nəfər həlak oldu
Gündəm24.az xəbər verir ki, ABŞ Cənub Komandanlığının yaydığı məlumata görə, ABŞ hərbi qüvvələri Şərqi Sakit Okeanda narkotik qaçaqmalçılarına məxsus olduğu iddia edilən daha bir gəmini hədəfə alaraq məhv edib. Bildirilib ki, kəşfiyyat məlumatları gəminin regionda tanınmış narkotik marşrutları boyunca hərəkət etdiyini və qaçaqmalçılıq fəaliyyəti ilə məşğul olduğunu təsdiqləyib.
Əməliyyat nəticəsində bir nəfərin öldüyü, iki nəfərin isə sağ qaldığı qeyd olunub. ABŞ Sahil Mühafizəsinə sağ qalanların tapılması üçün axtarış-xilasetmə tədbirlərinin dərhal aktivləşdirilməsi tapşırılıb.
Bununla yanaşı, ABŞ-ın narkotiklə mübarizə əməliyyatları ətrafında mübahisələr də davam edir. Məlumatlara görə, ötən ilin payızından bəri narkotik qaçaqmalçılarına qarşı həyata keçirilən zərbələr nəticəsində 200-dən çox insan həyatını itirib. Digər iddialarda isə bəzi əməliyyatlar zamanı insan alveri qurbanlarının da həlak olmuş ola biləcəyi vurğulanır. Bu faktlar ABŞ-ın dənizdəki əməliyyatlarının humanitar nəticələri ilə bağlı sualları yenidən gündəmə gətirib.
Sədaqət Həsənova
