“Bu gün vitaminlər deyildikdə, adətən onların insan orqanizmi üçün faydalı olduğu nəzərdə tutulur. Lakin bu, o demək deyil ki, həkim məsləhəti olmadan, müayinə keçmədən istənilən vitamini istənilən dozada qəbul etmək olar”.
Bu sözləri SİA-ya açıqlamasında qida eksperti İlkin Şirinov bildirib.
.jpg)
Onun sözlərinə görə, bu, qətiyyən düzgün deyil: “Bəzi vitaminlər düzgün istifadə edilmədikdə orqanizmdə metabolik pozğunluqlara səbəb ola bilər, mövcud xroniki xəstəlikləri ağırlaşdıra bilər. Hətta insanın xəbərsiz olduğu gizli xəstəliklər belə vitaminlərin təsiri ilə üzə çıxa və ya şiddətlənə bilər.
Təəssüf ki, bəzən insanlar həkim məsləhəti olmadan arıqlama vasitələrindən, müxtəlif çaylardan və ya preparatlardan istifadə edirlər. Bu isə gələcəkdə ciddi sağlamlıq problemlərinə gətirib çıxara bilər.
Vitaminlərin həddindən artıq qəbulu da təhlükəlidir. Bəzi vitaminlər, xüsusilə yağda həll olunanlar, orqanizmdə yığılaraq zəhərlənməyə səbəb ola bilər. Məsələn, A və D vitaminlərinin normadan artıq qəbulu ciddi fəsadlar yarada bilər.
Xüsusilə allergiyası olanlar, şəkərli diabet xəstələri, hamilə qadınlar və uşaqlar vitaminləri mütləq həkim nəzarəti ilə qəbul etməlidirlər. Çünki qəbul edilən vitaminlər digər dərmanlarla uyğun gəlməyə bilər və bu da əlavə problemlərə səbəb ola bilər.
Vitaminlər faydalı olsa da, onların düzgün və təhlükəsiz istifadəsi yalnız həkim məsləhəti ilə mümkün olmalıdır. Özbaşına və nəzarətsiz qəbul isə sağlamlıq üçün ciddi risk yaradır”.
