Hazırda bazarlarda mövsümü tam başlamadan satışa çıxarılan, hələ yetişməmiş meyvələrə tez-tez rast gəlinir.
Yaz aylarının əvvəlində bu meyvələrə olan tələbatın artması bəzi satıcıları məhsulu vaxtından əvvəl yığaraq satışa təqdim etməyə sövq edir. Xarici görünüşü cəlbedici olsa da, tam yetişməmiş meyvənin dadı turş olur və tərkibi də yetişmiş meyvələrdən fərqlənir. Bu isə onun sağlamlığa təsiri ilə bağlı müəyyən suallar yaradır.
Mövsümündən əvvəl, yəni tam yetişməmiş halda istehlak olunan meyvənin insan sağlamlığına hansı təsirləri ola bilər? Bu zaman zəhərlənmə riski nə dərəcədədir və istehlak zamanı nələrə diqqət etmək lazımdır?
Qida eksperti Fərid Səfərov Sfera.az-a açıqlamasında bildirib ki, mövsümündən əvvəl bazara çıxarılan və tam yetişməmiş halda istehlak olunan meyvələr bəzi hallarda insan sağlamlığı üçün risk yarada bilər.
Onun sözlərinə görə, əsas problem odur ki, bu məhsulların daha tez yetişdirilməsi üçün istixana şəraiti, böyümə sürətləndiriciləri və ya normadan artıq gübrə istifadəsi halları ola bilir:
“Nəticədə meyvənin həm dadı, həm də qida dəyəri zəifləyir, tərkibində isə nitrat və digər kimyəvi qalıqların miqdarı arta bilər. Tam yetişməmiş meyvələr həzm sistemi üçün də ağır ola bilər. Xüsusilə yüksək turşuluq mədə ağrısı, köp, ürəkbulanma və həssas insanlarda bağırsaq pozğunluqları yarada bilər. Bəzi hallarda düzgün saxlanmayan və ya kimyəvi maddələrlə həddindən artıq işlənmiş məhsullar qida zəhərlənməsi riskini də artırır. Bu risk uşaqlarda, yaşlılarda, hamilələrdə və xroniki xəstəliyi olan insanlarda daha ciddi ola bilər”.
Ekspert vurğulayıb ki, istehlak zamanı bir neçə məqama diqqət etmək vacibdir:
“Meyvələri axar su altında yaxşı yumaq, çox parlaq, normadan artıq iri və süni görünən məhsullara ehtiyatla yanaşmaq, kəsildikdə iç hissəsi tam yetişməmiş və dadsız olan meyvələri çox istifadə etməmək və mövsümündə yetişən məhsullara üstünlük vermək lazımdır. Ümumilikdə, mövsümündə yetişən meyvələr həm daha faydalı, həm daha təhlükəsiz, həm də qida dəyəri baxımından daha zəngin hesab olunur”.
