Dövlət İmtahan Mərkəzi (DİM) I və IV ixtisas qrupları üzrə iyulun 12-də keçirilən qəbul imtahanının nəticələrini elan edib.
I ixtisas qrupi üzrə ən yüksək nəticə göstərən – 697.5 bal toplayan 2 nəfərdən biri Qubadlı rayonundakı Əliyar Əliyev adına Qəzyan kənd orta məktəbinin məzunu Aysu Məhərrəmlidir.
Gündəm24.az bildirir ki, Modern.az saytı Aysu Məhərrəmli ilə həmsöhbət olub və onun qəbul təəssüratlarını öyrənib:
O qeyd edib ki, ilboyu yüksək nəticə göstərəcəyinə inanıb və hədəfi maksimum – 700 bal toplamaq olub.
“İl ərzində nəticələrim yüksək idi. Hətta əvvəlki sınaqlardan etibarən deyirdim ki, 700 bal yığacam. Əslində elə olmadı, amma 697,5 bal da buna çox yaxındır. İmtahandan çıxandan sonra isə kodlaşdırma prosesini çox stresli vəziyyətdə yerinə yetirdiyim üçün cavablar açıqlanana qədər narahat idim. Düşünürdüm ki, bəlkə haradasa səhv etmişəm. Buna görə də nəticəni görəndə həm çox təəccübləndim, həm də çox sevindim”.
Aysu Məhərrəmli ali təhsilini Bakı Ali Neft Məktəbində İnformasiya Təhlükəsizliyi ixtisası üzrə davam etdirmək istədiyini deyib.
“Telefonuma bildiriş gəldi. Həmin vaxt anam da yanımda idi. Bu sevinci ilk olaraq onunla bölüşdüm”.
Hazırlıq prosesindən danışan Aysu Məhərrəmli qeyd edib ki, qəbul imtahanına 10-cu sinifdən etibarən repetitor yanında hazırlaşıb:
“10-cu və 11-ci sinifdə hazırlığa getmişəm. Hazırlıq prosesim iki il ərzində bir qədər fərqli olub. 10-cu sinifdə gün ərzində təxminən 7-8 saat dərs oxuyurdum. 11-ci sinifdə isə bu müddət 6-7 saata endirdim. Çünki artıq proqramın böyük hissəsini mənimsəmişdim və daha çox bildiklərimin üzərinə əlavə edirdim. Hər iki imtahana son bir ay qalmış isə hazırlığımı daha da intensivləşdirmişdim və bəzi günlər 10 saata yaxın çalışırdım”.
687 bal toplayan abituriyent gələcək imtahan iştirakçılarına planlı və intizamlı olmağı da tövsiyə edib:
“Abituriyentlərə ilk növbədə planlı olmağı tövsiyə edərdim. Məncə, plan qurmaq ən vacib məsələlərdən biridir. Plansız şəkildə irəliləmək mümkün deyil. Eyni zamanda motivasiyanın gəlməsini gözləməsinlər. Çünki əsas olan motivasiya deyil, intizamdır. Motivasiya gəlib-keçən hissdir, amma bu yolu sonadək davam etdirməyə kömək edən məhz intizamdır”.
