Son dövrlərdə küçə ticarətində və açıq şəraitdə satılan qida məhsullarına maraq olsa da, bu cür satışın gigiyenik şərtlərə tam əməl olunmadan həyata keçirilməsi narahatlıq doğurur.
Xüsusilə havaların istiləşməsi fonunda məhsulların tez xarab olması, saxlanma və daşınma qaydalarına düzgün riayət olunmaması istehlakçılar üçün əlavə risklər yaradır.
Bu baxımdan məsələ həm ictimai sağlamlıq, həm də qida təhlükəsizliyi baxımından аktual olaraq qalır.
Bəs görəsən, açıq şəraitdə satılan qidaların istehlakı zamanı ən çox rast gəlinən təhlükələr hansılardır və istehlakçılar özlərini qorumaq üçün nələrə diqqət etməlidirlər?
Qida eksperti Fərid Səfərov Sfera.az-a açıqlamasında bildirib ki, açıq şəraitdə satılan qidalar, o cümlədən küçə yeməkləri, açıq vitrinlərdə saxlanılan şirniyyatlar, salatlar və digər məhsullar son illərdə daha çox risk mənbəyi kimi qiymətləndirilir. Onun sözlərinə görə, bunun əsas səbəbi gigiyena nəzarətinin kifayət qədər olmaması və qidaların düzgün saxlanma şəraitinə riayət edilməməsidir:
“Belə şəraitdə ən çox rast gəlinən təhlükələrdən biri mikrobioloji çirklənmədir. Açıqda saxlanılan qidalar toz, hava və xüsusilə milçəklər vasitəsilə müxtəlif bakteriyalarla çirklənə bilər ki, bu da salmonella, E.coli kimi qida zəhərlənmələrinə yol aça bilər. Digər mühüm risk temperatur rejiminin pozulmasıdır. Xüsusilə isti havalarda qidaların açıq şəraitdə saxlanılması bakteriyaların sürətlə çoxalması üçün əlverişli mühit yaradır. 5-60°C aralığı isə mikroorqanizmlərin ən aktiv inkişaf etdiyi “təhlükəli zona” hesab olunur. Eyni zamanda gigiyena qaydalarına əməl olunmaması, çarpaz çirklənmə və məhsulların mənşəyinin qeyri-müəyyən olması da istehlakçılar üçün əlavə risk yaradır”.
Ekspert qeyd edib ki, bu cür qidalardan qorunmaq üçün istehlakçılar bir sıra məqamlara diqqət etməlidirlər:
“Qidanın görünüşü və saxlanma şəraiti əsas göstəricilərdən biridir. Üzəri açıq, qurumuş və ya rəngi dəyişmiş məhsullardan uzaq durmaq tövsiyə olunur. İsti yeməklərin isti, soyuq məhsulların isə soyuq şəraitdə təqdim olunması vacibdir. Satış nöqtəsinin təmizliyi, satıcının gigiyena qaydalarına əməl etməsi və ümumi səliqə də mühüm göstəricilərdir. Xüsusilə mayonezli salatlar, süd və ət məhsulları kimi tez xarab olan qidalarda daha diqqətli olmaq lazımdır. Eyni zamanda qoxu və dad dəyişikliklərinə qarşı həssas olmaq, şübhəli məhsulları istehlak etməmək, yeməkdən əvvəl əlləri yumaq və ya dezinfeksiya etmək qida zəhərlənməsi riskini əhəmiyyətli dərəcədə azaldır”.
